Shillong, Nailar 16
U Myntri Rangbah ka Jylla, u Conrad K. Sangma u la ong ba ka Meghalaya ka ïai bteng ban long ka Jylla kaba suk ba saiñ kaba don ïa ka jinglong-jingman kaba biang na bynta ka roi ka par bad ka kam khaïi-pateng.
Haba ai jingkren ha ka jingrakhe Sngi Laitluid kaba la long ha Shillong ha ka Sngi Thohdieng, u Sangma u la ong ba ka Jylla ka la kiew shaphrang ha ka ban pynbeit ïa ki jingeh khappud kaba la neh la slem bah bad ka Assam, kaba la ïalam da ka jingïateh kular ne ka ‘Memorandum of Understanding’ (MoU) hapdeng kine ki ar Jylla.
“Hadien ka jingïalang ha ka kyrdan jong ki Myntri Rangbah, ka jingtei ïa u mawpud hapdeng ki Jylla ha ka thaiñ Hahim ka la dep, bad ka kam ka dang ïaid haba ïadei bad kiwei pat ki jaka,” u la ong da kaba bynrap “Kane ka pyni ïa ka jingkiew kaba pawshai na bynta ka jingpynbeit bad jingïatreilang kaba neh hapdeng ki ar tylli ki Jylla ba marjan.”
U Myntri Rangbah u la pynbna ruh ba ka Meghalaya ka la pyntreikam pura ïa ki ‘Criminal Law’ bathymmai, da kaba ai ïa ka jinghikai ba bniah ïa ki ophisar pulit, ki nongsaid aiñ, bad ki nongbishar ban pynkhlaiñ shuh-shuh ïa ki nongrim jong ka hok ha ka Jylla.
U la pyntip ba ka teknoloji kum ka ‘e-Sakshya’ bad ka ‘e-FIR’ ka la kham pynkloi ïa ka jingbishar hok, katba ki ‘Mobile Forensic Van’ bad ki kynhun ‘riew shemphang mynta ki poi sha man la ki distrik.
Ka Directorate of Prosecution kaba kyrpang ka la don, kaba pyntikna ba haba ki kam runar ki jia, ka hok kam dei tang kaba la kular, hynrei la pyndep, u la bynrap.
