Shillong, Nailar 16 (UNI)
U Myntri Rangbah ka Jylla, u Conrad K. Sang-ma ha ka Sngi Saitjaiñ u la ïakynduh ïa u Myntri Rangbah ka Assam, u Dr. Himanta Biswa Sarma ban ïakren halor ki mat bapher-bapher kiba ïadei bad baroh 2 tylli ki Jylla.
“Nga sngewkmen ban ïakynduh bad u Myntri Rangbah ka Assam, u Dr. @himantabiswa ha Guwahati na ka bynta ka jingïakren kaba seisoh ban nang pynkhlaiñ shuh shuh ïa ki jingïadei hapdeng kine ki 2 Jylla jong ngi bad ban wad ïa ki lad ki lynti na bynta ka jingïatreilang kaba kham khraw,” la thoh u Sangma ha ka rynsan lad pathai ‘X’ hadien ka jingïakynduh bad u Sarma ha ophis treikam jong u ha Dispur.
U Myntri Rangbah ka Assam u la batai ba ki jingïakren ha ka jingïakynduh bad u Myntri Rangbah ka Meghalaya ki long kiba paka tam.
“Ngi la ïakren halor ki mat kiba bun ban pynkhlaiñ ïa ka jingroi lang jong baroh ar tylli ki Jylla jong ngi,” la thoh u Sarma ha ka rynsan lad pathai ‘X’.
Hynrei na ka liang jong baroh arngut ki Myntri Rangbah kim shym la ïasam ïa ki jingtip ba bniah halor ki mat ba la ïakren ha katei ka jingïakynduh.
Kumban shu kdew hangne, kane ka dei ka jingïakynduh kaba ar hapdeng u Sangma bad u Sarma hadien ka jingïakren ba khatduh jong ki ha ka kyrdan Myntri Rangbah kaba la long ha ka 2 tarik u Jylliew, ha kaba baroh arngut ki nongïalam ki la mynjur ban buh ïa ki maw-pud ha ki 5 na ki 6 tylli ki jaka ba don hapdeng ka jingïa-ka-jia hashuwa ka Sngi Laitluid.
Ha ka jingkren jong u ha ka jingrakhe ïa ka Sngi Laitluid ha ka Sngi Thohdieng, u Myntri Rangbah ka Jylla u la ong ba u mawjam uba kongsan u la long ka jingjam shakhmat ha kaba ïadei bad ka jingpynbeit ïa ki jingeh khappud kiba la slem bah bad ka Assam, kaba ïalam lynti da ka jingïateh kular ne ka ‘Memorandum of Understanding’ kaba la ïasoi hapdeng kine ki 2 Jylla.
U Sangma u la ong ba ka jingtei ïa u païa hapdeng ki Jylla ha ka thaiñ Hahim ka la dep, bad ka kam ka dang ïaid ha kiwei-kiwei ki jaka kumjuh.
“Kane ka pyni ïa ka jingkiew kaba pawshai na bynta ka jingpynbeit bad jingïatreilang kaba neh hapdeng ki ar tylli ki Jylla ba marjan”, la ong u Myntri Rangbah.
