Mawkyrwat, Nailar 17
Ka Khasi Students Union (KSU) South West Khasi Hills District ha kine ki khyndiat sngi ba la dep, ka la leit ban ai jingthoh ïa u Syiem ka Hima Maharam ban pyrshah ïa ka jingthmu bad ka jingsuhbuit jong u bad katto katne ki Myntri ban die jaka sha ki shipai BSF ka ban kot sha ka 70 akar eiei ha Photmula kaba hap hapoh ka Ranikor Civil Sub Division, South West Khasi Hills District.
Katkum ka kyrwoh khubor na u samla Forwardman Nongrem, President KSU SWKHD u la ong ba ka seng ka pynshai paidbah kdar ba kam lah ban ap haduh ba u Syiem un da la dep die, hynrei ka seng ka pyrshah jur shwa ba u Syiem un leh ïa kata namar ba ka la dep ïoh jingtip ïa ka jingthmu jong u.
U samla Forwardman Nongrem u la ong ruh ba katkum ka jingpynshai jong u Syiem kata ha ka 15 tarik u Nailar, 2025 sha ki lad pathai khubor ba um pat rai hangno ban ai jaka, hynrei ki la tyrwa bun tylli ki jaka ba ki shipai kin jied bad kane ka kam ka dei kajuh kaba ka KSU ka sngewthuh ba u Syiem u mut bad kaba la pynlong ïa ka seng ba kan pynpaw paidbah ba kan pyrshah.
Shuh shuh u la ong ruh ba ka jingkynnoh ïa ka seng ba kam tip ïa ki jingshisha, ka dei ka juh ka jingshisha ba u Syiem u la thmu ban pynkohnguh ïa ki katto katne ki Myntri bad ban pynbieit paidbah da ki jingtyrwa ne ki jingïapeiñ ki bym shongnia ïano ïano ruh.
Ka jingshisha kaba paw hi ka long, ban die ïa ki jaka ka Hima da ki phew akar ban pynmyntoi ïa u Syiem shimet bad ïa ki katto katne ngut, hynrei ki ban mad ïa ki jingeh ki jingshah pynwit bad jingshah pynthud kan long ïa ki khun – ki hajar jong ka Hima Maharam ha ki kam ki jam bad ha ka rep ka riang jong kiba mynta bad ki ban dang wan pateng la pateng.
U samla Forwardman u la ong ruh ba ka jingkam jong uwei u Myntri ba kim dei ki myndie ri namar kim pat rai ïa kano ka jaka ban die, ka dei ka jingshisha namar ïa mynta ki dang ïatyrwa ïa ka jaka bad ki dang ïa thlieh-dor bad kin sa die hadien kumba une u Myntri u la pynshai hi ha ki lad pathai khubor ha ka 15 tarik u Nailar, 2025 ryngkat bad u Syiem.
Kumta Ka KSU ka kren da kaba shai ba lada u Syiem um pat rai, ne u la dep rai, ka seng ka ïeng pyrshah ïa ka jingthmu jong u Syiem bad katto katne ki Myntri jong u bad kan ïai long kaba peitngor bad kan ïeng pyrshah la ka long da kino kino ki lynti.
Ka seng ka kynthoh ruh ïa ka jingkam u Syiem ban siew bai lutksan sha ki nongrep ba ka dei ka jingpyrshang ban pynbieit bad ïalam bakla bad ïa kaba kum kane ka seng kan nym lah ban pdiang.
Ka jingong ba ki mut ai jaka ban ïohkam ïohjam ki samla ka dei ka kamkai kaba ngin nym lah ban pdiang da leilei ruh em namar ba haei ngi ïohi ba kiba bun ki Khasi ki ïohkam ïohjam ha Upper Shillong, 7 Mer ne kiwei ki jaka shipai ha kane ka jylla, u la ong.
U samla Forwardman u la pynbna paidbah ruh ba kan ïaid beit ïa ka jingïalang paidbah ha ka 20 tarik u Nailar, 2025 (sngi Balang) ha ka por 10:30 mynstep bad ha kato ka sngi u la ong ruh ba ka seng kan sa shim ïa ka rai kaei ban leh nangne shakhmat.
