Khliehriat, Nailar 17
Ka Suchen Lumïarain SC ka la long ka lahduh ha ka lympung ïalehkai 3rd Division Football Tournament ba la pynïaid da ka East Jaiñtia Hills District Football Association (EJHDFA), hadien ba ka la lah ban pynliem noh ïa ka Narwan SCSC lyngba ka tie-breaker da 3-2 kl ha ka 16 tarik mynta u bnai ha madan Artificial Turf Diengshynrum, Khliehriat.
Haba phai sha katei ka jingïakhun final, ki arliang mamla ki la pyrshang tyngeh ryngkat ka kabu ban ïoh pynkhih jar bad ban rah ïa ka nam lahduh, hynrei kane ka jingpyrshang jong ki, kam shym la urlong satia ha kaba ka por kaba la buh, kim shym la lah ban thep kol.
Dei hadien ba la rah ïa ka jingïakhun sha ka tie-breaker ba ka Suchen Lumïarain ka la jop da 3-2 kol ïa ka Narwan SCSC.
Ïa ki khusnam sha ka kynhun lahduh bad ba wan ba-ar la sam da ki song pisa ryngkat ka trophy da u Block Development Officer (BDO) ka Wapung u Dr. Tammiyaki Shylla kum u kongsan ha ka jingdonlang u MDC u Bah Krison Langstang, ki nongïalam bad dkhot nongkitkam ka EJHDFA.
Ïa ka nam Player of the Match ba la ïoh da u Deibormi Shadap, Player of the Tournament sha u Miki Suïam, Best goalkeeper ka leit sha u Da o hi Shadap. Kine baroh ki dei na ka Narwan SCSC, katba ka nam Top Scorer ka leit sha u Wanmi Lamurong jong ka Suchen Lumïarain SC.
