Shillong, Nailar 17
Ka North East Students’ Organisation (NESO) kala pynbna ban pynlong ïa ka ‘Sit in Strike’ lashai ka sngi ka 18 tarik Nailar, ha man ki nongbah jong ki Jylla ka thaiñ Shatei Lam-Mihngi, ban pynbor ïa ka Sorkar India bad Sorkar Pdeng ba kin shna ïa ki aiñ ki ban pyrkhing ïa ka jingrung laitlan ki briew ba nabar ri.
Ka NESO kala shim ïa kane ka rai ha ka jingïalang kaba long ha Guwahati ha ka 6 tarik Nailar. Kane ka jingïakhih kan long ha Guwahati, Shillong, Itanagar, Aizawl, Kohima, Imphal bad Argartala.
Hangne ha Shillong, ka Khasi Students’ Union (KSU) kaba dei ka dkhot ka NESO, kan pynlong ïa kane ka jingïakhih ha Khyndailad hakhmat ka Assembly. Kane ka jingïakhih kan sdang naduh ka por 12 baje mynsngi haduh 3 baje nohphai sngi. Ïa kane la pyntip da u General Secretary ka KSU samla Donald V Thabah.
