Shillong, Nailar 17
Ka samla Khasi kaba tip kyrteng kum ka Chaivalry Lartang kaba sah ha Shillong kaba mihkhmat ïa ka jylla Meghalaya ka la poi sha ka final ha ka jingïaknieh ban rah ïa ka nongjop ‘thei bhabriew Miss Universe kaban long lashai ka sngi ka 18 tarik Nailar 2025 ha Jaipur.
Kumta kiba haïing hasem ki la kyrpad ïa ki paidbah ka jylla ban ai jingkyrshan ïa ka da kaba like, share ha instagram bad YouTube Chaivalry Lartang khnang ba ki nongbishar kin ïoh kheiñ point lang.
Haba ïakren bad ka Evangel Lartang, hynmen trai jong ka Chaivalry ka la ïathuh ba ka Chaivalry Lartang kaba dang 23 snem ka rta ka la sah mynta kumba shibnai sha kawei ka jaka ha Rajasthan bad mynta ka la poi sha Jaipur namar kin ïakhun ïa ka final ha ka janmiet jong ka 18 tarik Nailar 2025.
Ka la ïathuh ba ha kine ki sngi ki don kumba 53 ngut kiba ïashimbynta ban mihkhmat na man ki jylla.
Ka la pyntip ba ka Chaivalry ka leit hi marwei sha Rajasthan khlem don nongleit bud hynrei mynta ka donkam ïa ka vote na ki paidbah ban like ïa ka kyrteng Chaivalry ha instagram bad ha youtube Miss Universe India.
Shuh shuh ka la pynpaw ba lada ka jop ka hap ban leit ïakhun sha kiwei pat ki ri ka pyrthei.
“Haduh mynta ka Chaivalry ka dang duna ki like ha instagram bad YouTube namar bun ki bym pat tip katba kiba mihkhmat na Manipur ka la kiew bha,” ka la ong.
