Shillong, Nailar 17
Ki nongshong shnong jong ka Riat Laban Kynjat Phutbol ki la dap da ka jingkmen bad ka jingphuh mut phuh mat, hadien ba ki la ïoh ïa ka surok dewbilat, ka surok kaba ki la khmih lynti la slem bha.
Kane ka surok dewbilat ba la shna thymmai, ka dei kaba la pynïoh da u MLA ka South Shillong Konstitwensi u Bah Sanbor Shullai ha ka jinglut kaba ka kot sha ka 57 lak tyngka bad kane ka surok ka dei ruh kaba poi shaduh ka shnong jong ki, kaba don ha kjat jong u Lum Shyllong.
Ïa kane ka surok kaba la shna bha da ka dewbilat la plie paidbah da u MLA ka thaiñ Bah Sanbor Shullai ha ka sngi Saitjaiñ ryngkat ka jingdonlang u Assistant Executive Engineer Bah N Lyngdoh, Additional Deputy Commissioner Kong Dolly Kharmalki, Bah Wallambok Khong-wir, Vice Chairman MT-DC, kiwei ki ophisar kumjuh u Rangbah Shnong Bah Shaiphar K Wahlang bad ki nongïalam shnong na ka shnong ba marjan.
Ïa kane ka surok ba la tei ha ka jinglut kaba 57 lak tyngka, ka la don ruh ka jingtyrwa ba nangne pat yn dang bteng biang ban shna ha ka kylla kaba bud.
U Bah Sanbor haba kren ha kane ka sngi u la ïathuh ruh ba shen kane ka thaiñ kan sa ïoh ruh ïa ka madan phutbol kaba paka kaba yn pynïasoh da ka surok kaban shna ha ka kylla kaba ar.
Ha kajuh ka por u la pyntip ruh ba ïa ka ïingdorbar kaba rim yn sa pynpra noh bad tei thymmai da ka Cultural Centre kaba lai mala kaban don lang naduh ka jaka ïeng kali, ka community hall ha ka mala kaba ar katba ha ka mala kaba lai pat la mang ban buh ïa ka ophis treikam jong ka Dorbar Shnong, jong ka Seng Kynthei nangta na bynta ki samla bad kiwei kiwei.
Shwa kane u Bah Sanbor u la plie ïa ka surok thymmai kaba pynïasoh na jan ka surok markhap bad ka community hall Madan Laban pat mih pat sha Khlaw Laban (Laban Forest) ba la shna ha ka jinglut ba 83.70 lak tyngka.
Katkum ka jingïathuh da u Rangbah Shnong Bah Iostar Sunn, ïa kane ka surok la shna ha ka jaka ïaid kjat kaba rit bha hynrei mynta pat ka la kylla kum ka lynti ïaid kali kaba la pynkmen haduh katta katta ïa ki nongshong shnong.
Ha kane kajuh ka sngi u Bah Sanbor u la plie ruh ïa ka jaka sum bad kajaka leit painkhana kaba la shna na ka bynta ki nongsait jaiñ na ka shnong Riat Laban Kynjatphutbol.
