Jerusalem, Nailar:
Ka tnad shipai jong ka Israel, ka la ong ha ka sngi thohdieng, ba ka la mynjur ïa ka rukom treikam na ka bynta ka jinghiar thma kaba thymmai ha Gaza Strip, namar ba ka Hamas, ka pynrem ïa kaei kaba ka la khot ïa ki jinghiar thma ba shyrkhei jong ka Israel ha ka nongbah Gaza jong ka Palestine.
Kane ka jingthmu bad jingpynkhreh ba la mynjur na ka bynta ka jingbteng biang ïa ka jinghiar thma ka long hadien katto- katne sngi ba ka kynhun myntri pahara jong ka Israel ka la khot ban knieh noh ïa ka nongbah kaba heh tam jong ka Palestine hadien 22 bnai jong ka thma kaba la wanrah ïa ki jingeh kiba shyrkhei ia ki paidbah nongshong shnong jong ka nongbah Gaza.
U heh shipai jong ka Israel, u Lieutenant General Eyal Zamir, u la mynjur ïa ka rukom treikam ba kongsan naka bynta ka jingthmu bad jingpynkhreh ba thymmai jong ka tnat shipai IDF ha kane ka kynti, ban leit tur biang sha Gaza Strip bad ban knieh noh syndon ia ka bor synshar na kti jong ka Hamas namar la ong ba ka Israel kam lah shuh ban shu iai shah bad iai ap naba ka Hamas ruh kam shym pyllait ia ki briew jong ka Israel kiba ka la kem naduh u snem ba ka leit ban hiar thma nyngkong eh ia ka Israel.
Ka sorkar jong u Myntri Rangbahduh ka ri, u Benjamin Netanyahu, kam shym la ai ia ka por kaba thikna, lano ki shipai Israel, kin leit ban rung bad hiar thma biang sha nongbah Gaza, ha kaba da ki hajar ngut, ki la leit rieh tngen, hadien ba ki la phet krad na ki jing thombor kiba hashwa.
