Shillong, Nailar 17
Ka Mawkasiang ka la rah ïa ka nam lahduh ha ka U-20 Fourth Division 2025 ba la pynïaid da ka Shillong Sports Association (SSA) hadien ba la lah ban pynliem noh ïa ka Mawlynrei lyngba ka tie-breaker da 3-1 kol ha ka sngi Saitjaiñ ha SSA Stadium kaba ha First Ground, Polo.
Haduh kab kut ki 80 minit kitei ki kynhun ki la ïakhaid mar 2-2 bad ym shym la don ba lah ban thep kol ha ka ‘extra time’. Hapdeng ka jingïakhun kaba khluit bad kaba ïaryngkat, ka Mawlynrei kam shym la lah ban thep kol ha ka jingïashut ïa ka tie-breaker, hynrei ka Mawkasiang ka la ïoh ban thep kol ban khur syndon ïa ka jingjop.
Lyngba katei ka nam jop ka Mawkasiang ka la ïohpdiang ïa ka cheque kaba T. 60,000, katba ka Mawlynrei ka la ïoh T. 30,000 tyngkat ki trophy. U rangapkol ka Mawkasiang u Farbious Marbaniang u la ïohpdiang ïa ka nam Man of the Match hadien ba u la lah ban pyllait ïa ki ar tylli ki kol ha ka tie-breaker, katba ïa ka nam Top Scorer la ïoh da u rangïalehkai ka Mawplang SC u Phasdonlang Hynñiewta, uba la lah ban thep 9 kol ha kane ka lympung ba kynthup ïa ar tylli ki hat-trick.
Ïa kitei ki khusnam la sam da u President ka Meghalaya Football Association (MFA) u Bah Hamletson Dohling, kumjuh u President ka SSA u Bah Banteidor Lyngdoh ha ryngkat ki dkhot ka SSA bad kiwei kiwei.
Lah ban kdew, ka Mawkasiang bad ka Mawlynrei, lem bad kiwei pat ki ar tylli ki kynhun kiba la shah rem ha ka semi final kata ka Lummawbah bad ka Lapalang, ki la kiew kyrdan sha ka Third Division na ka bynta ka aïom ka ban wan.
