Shillong, Nailar 17
Ar ngut ki ‘thei ïalehkai ka Jylla ki la shah jied ban mihkhmat ïa ka kynhun ïalehkai ka ri India n aka bynta ka SAFF U-17 Women’s Championship Bhutan 2025, kaba la thmu ban sdang naduh 20 haduh 31 tarik mynta u bnai ha Thimphu.
Kine ki long ka Alisha Lyngdoh (defender) lem bad ka Bonifilia Shullai (midfielder) hadien ba u coach ka kynhun ialehkai U-17 jong ka ri u Joakim Alexandersson u la pynbna ha ka sngi U Blei ïa ka thup ki 23 ngut ki ‘thei ïalehkai na ka bynta katei ka lympung.
U Alexandersson, uba la lah ban pynurlong ïa ka kynhun ki ‘thei ïalehkai U-20 ban lah ban pynurlong ha ka sien kaba nyngkong eh ha ki 20 snem ban ïoh rung sha ka AFC U-20 Women’s Asian Cup, mynta un ïalam sa ïa ka kynhun ïalehkai U-17 ha ka SAFF Championship na ka bynta ban pynkhreh ïashim bynta ha ka AFC U-17 Women’s Asian Cup Qualifiers, kaba la thmu ban long ha u Risaw mynta u snem ha Kyrgyz Republic.
Ha katei ka lympung ïalehkai SAFF U-17 Women’s Championship, ka India, Bhutan, Nepal, bad ka Bangladesh kin ïakhun pyrshah ha ki ar tylli ki wat. Kawei pa kawei ka kynhun kan ïakhun hynriew sien bad ka kynhun ka ban bat ïa ka kyrdan ba hakhlieh kan long ka lahduh.
Te kumta ka India kan sdang ïa ka jingïalehkai ba nyngkong pyrshah ïa ka Nepal ha ka 20 & 29 tarik mynta u bnai, ha kaba yn bud sa ka ïa ka Bangladesh (22 & 31 tarik) bad u Bhutan (24 tarik bad 27).
