Guwahati, Nailar:
Kawei ka nongpynïaid skul sorkar ha ka Nagaon distrik jong ka Assam pdeng ka la shah kem hadien ba ka durkhih jong ka kaba la kynnoh ba ka pyndonkam ïa ki kjat jong ka ban khylliap ïa ka lama ka ri India ka la saphriang bha.
Kane ka Headmistress kaba la shah kem ka dei kaba la tip kyrteng kum ka Fatema Khatun na Gopinath Dev Goswami High School kaba don ha ka thaiñ Samaguri ha Nagaon.Katei ka jingjia ka la jia ha ka step sngi Saitjaiñ ha ka phyllaw jong ka Gopinath Dev Goswami High School.
Ka jingpynhiar lama jong ka skul la buh ban long ha ka janmiet jong ka sngi Thohdieng, hynrei ym shym la pynlong ïa ka. La ïathuh ba ha ka sngi Saitjaiñ, ka Khatun, ka la leit marwei sha katei ka skul, ha ka por 7:30 baje mynstep, ban pynhap ïa ka lama.
Ka durkhih jong katei ka jingjia ka pyni ba ka buh ïa ka lama lairong hapoh ka kjat jong ka bad ka pyndonkam ïa ki kjat jong ka ban khylliap ïa ka hadien ba ka la weng ïa u dieng sieh lama. Hadien ka jingujor, ki pulit ki la kem ïa ka Khatun hapoh ka jingtreikam ka Prevention of Insults to National Honour Act, 1971.
La rah ïa ka hakhmat ka ïingbishar jong ka Nagaon, kaba la hukum ban set ïa ka ha ka jingshah set phatok kaba 14 sngi. Katkum ka jingong jong ki pulit, ka nongpynïaid skul ka la ïakynduh ïa ka jingshah kynthoh na ki nongshong shnong namar ka jingbym lah jong ka skul ban pynhiar ïa ka lama ha ka sngi Thohdieng.
