Wellington, Nailar:
U Myntri ka tnat kam bar ri jong ka New Zealand ha ka Sngi Nyngkong u la ong ba ka New Zealand ka dang pyrkhat ban i-thuh noh ia ka jylla Palestine hadien ba la iohi ia ki jingiakynad hapdeng jong ka Israel bad ka Hamas, kaba la ktah jur ia ki paidbah nongshong shnong ka Palestine hapoh ka nongbah Gaza Strip.
Ka kynhun myntri jong u Myntri Rangbahduh katei ka ri, u Christopher Luxon, kan sa shim ia ka rai kaba thikna ha u Nailur bad kan wanrah ia ka rukom treikam jong ka sorkar, ha la ong u Myntri Rangbahduh.
Katto katne tylli ki ri, kynthup ïa ka Australia, Britain, bad Canada, ki la pynbna ha kine ki taiew ba ladep, ba kin ithuh noh ïa kawei ka jylla jong ka Palestine, ha ka jingïalang jong ka UN General Assembly, ha u bnai Nailur.
U Peters u la ong ba katba ki katto katne ki paralok ba jan jong ka New Zealand ki la jied ban ithuh ia ka jylla Palestine, ka New Zealand ka don ia ka polisi bar ri kaba laitluid ban bud ia kane hi kajuh ka rai kaba kitei ki ri ki la dep shim naduh ki por ba la leit.
“Ngi thmu ban thew bha ïa kane ka mat bad nangta ngin leh katkum ki nongrim, ki jinglong bad ka jingmyntoi jong ka ri jong ka New Zealand,” ong u Peters ha katei ka jingkren jong u.
Ka sorkar ka la donkam ban bishar bniah hato la don ne em ka jingkiew kaba biang na ka bynta ki jaka jong ka Palestine ban long ka jylla kaba lah ban treikam bad kaba dei hok na ka bynta ka New Zealand ban ai jingithuh.
