Jowai, Nailar 17
Ka Mookyndur ka la pynjem khnap ïa ka Grounded FC haduh 12-2 kol, katba ka Wahïajer SC ka la jop da shiteng dorjon ïa ka Nongkhroh Krem Kum ha ka Super Division Football Tournament (Kelsiroy Pala Memorial) ba la pynïaid da ka Thadlaskeiñ Sports Association (TSA) ha ka 16 tarik mynta u bnai ha Wahïajer Multi Sports Complex.
Na kine ki 12 tylli ki kol jong ka Mookyndur, ar ngut ki rangïalehkai ki la khyrwit da ki hat-trick, kynthup ïa u Wallamkupar Kharsohnoh uba la thep ha ka minit 20, 31 & 45+1, bad u Jomsing Pariat (48, 51 & 63). Ïa ki ar kol la thep da u Marshal Nongsiej (89 & 90+2), katba ïa kiwei pat la thep da u Careful Suting (19), Samehi Suting (25), Daimon Mukhim (39) bad u Bright Pariat (78). Ia ki artylli ki kol jong ka Grounded la thep da u Kularskhem Rymbai (52 & 86).
Ha kawei pat ka jingïalehkai ka Wahïajer ka la jop da 6-1 kol ïa ka Nongkhroh Krem Kum. U Dauru Phawa ula khyrwit da ka hat-trick ha ka minit 60, 67, 79 & 82 bad mar shikol pat la thep da u Heimonmi Dkhar (10), bad u Niki Pakma (49). Katba ïa ka kol jong ka Nongkhroh Krem Kum la thep da u Teilang Pyngrope (12).
Shwa kane ha ka jingïalehkai 2nd Division, ka Maya SC Umjlasiaw ka la pynliem noh ïa ka Mukhla Nongrim lyngba ka shi kol ba la thep da u Lemiki Dkhar ha ka minit kaba 12.
Ka Nongkhroh Sohbar ka la pynliem ïa ka Modop FC da 2-0 kol. Ïa kine la thep da u Shanti Dkhar (26) bad Promi Mynsong (31).
