Washington, Nailar:
U heh barim jong ka Pentagon, U Michael Rubin, u la ther tyngeh ïa u heh shipai jong ka Pakistan, u Asim Munir, halor ka jingkren jong u haba iadei bad ki tiar nuclear, da kaba ong ba ka Pakistan ka leh kum “ka ri ka bym don aiñ” ryngkat bad ka jingmlien ban kwah beit tang ia ka jingpynkhie thma.
U la ïanujor ruh ïa u heh shipai ba mynta jong ka Pakistan bad u Osama Bin Laden, u lehnoh uba don sha lyndet jong ka jingshah thombor ha ka 9/11, da kaba kdew ba ki jingkren jong u Munir dang shen ki pynkynmaw ïa kaei kaba ka pyrthei ka la ïohsngew na ka kynhun Islamic State.
Ka jingïakajia ka long halor ki jingkren ba dang shen jong u Field Marshal Asim Munir, ha kaba u la byrngem ba lada ka Pakistan “ka dei ban iapduh, kan pyn-um lang ia mar shiteng jong ka pyrthei ryngkat badka”. La iathuh ba ia kitei ki jingkren, la kren ha ka jingialang ha Tampa, Florida, ha kaba la don lang ki heh shipai jong ka US, ha kaba, ka India ka la pynrem jur ia ka jingbyrngem jong U Munir ban pynkhie da ka thma nuclear.
Katkum ka jingpynbna jong ka tnat kam bar ri, ka la kdew ba ka jingpyndonkam Nuclear, ka dei ka buit sniew bad buit khawpud jong ka Pakistan bad ka la pynpaw ia ka jingsngewsih ba kum kine ki jingkren, la kren na ka khyndew jong ka ri kaba lai kaba iajan.
