Shillong, Nailar 17
Ki runar ki bym lah ban tip ki dei kiei, kila wiang ding dusmon ïa ka ïingmane jong ka Khasi Jaiñtia Presbyterian kaba don ha ka shnong Pomlahier, Mawryngkneng ha East Khasi Hills District.
Katkum ka khubor na ki pulit, la suba ba kane ka jingjia kala jia ha ka shiteng synñia jong ka 14-15 tarik bad la lap nyngkong ïa ka, da ki nongshong shnong.
Ki pulit ki ïathuh ba katto katne ki bynta jong ka ïingmane kila julor na ki thylliej ding kynthup ïa ki ben ba shong ki nongleit jingïaseng. Kine ki runar kila thoh jingthoh ruh ha ka kynroh jong ka ïingmane kaba ong “JMR”.
“Ka jingtohkit mynta kala ïaid shakhmat ban lap ïa ki briew kiba donkti. Haduh mynta ngim pat ïoh kem ïano ïano ruh,” ong u Superintendent of Police ka East Khasi Hills Bah Vivek Syiem.
Na ka liang ki nongsharai ka Balang kila pynpaw ïa ka jingsngewsih bad kim pat lah ruh ban mutdur ba ki riew runar kin wan leh dusmon ïa ka jaka kyntang.
La pyntip ba kane ka jingwiang ding ïa ka ïingmane ha Pomlahier kala jia teng ruh ha ki snem bala dep hynrei u runar ba donkti, u la phla hi haba kynnoh ba dei uba don ka jingduna ha ka bor pyrkhat.
