Shillong, Nailar 18
Ka ïingbishar Meghalaya High Court kala bthah ïa u Special Officer ba la thung ha ka Public Interest Litigation (PIL) ba un ai ïa ka kaiphod kaba bniah halor ka jingdonlad ban thungdieng ha ki jaka ba pyntrei kam ïa ka Shillong Peak Ropeway Cable Car Project.
Ka PIL bala ujor da u Geraldine G Shabong, ka ujor ïa ka jingkynnoh pom dieng pathar bad pynkhyllem ïa bun bah ki dieng ha ka thaiñ Lawsohtun, East Khasi Hills na ka bynta ka Shillong Peak Ropeway Cable Car project.
Ka Sorkar Pdeng kala aibor ban pom ïa ki dieng katkum ki kyndon aiñ.
Ka ïingbishar kala thung ïa u Advocate General bad senior advocate K Paul kum u Special Officer ba un leit jurip ïa ka thaiñ bad ai ïa ka kaiphod halor ki lad kiba lah ban shim na ka bynta ka jingthung dieng biang ha ka thaiñ.
U Special Officer u la dep wan jurip ïa ka thaiñ bad shem ba ka lynti ka don ban thungdieng biang ha sawdong jong ka jaka ba pyntrei ïa ka project.
La aipor ba kin pynlong shuh shuh ïa ka jingjurip bad ban aiti ïa ka kaiphod kaba bniah.
“Ka long kaba pynkmen ban ïoh sngew na ki ba ka lynti ka don ha ka ban thungdieng biang ha ki jaka ba don sawdong jong ka project. Kila pan por ban leit jurip shuh shuh bad ban aiti ïa ka kaiphod kaba bniah haba ïadei bad ka lad bad ka jinglah ban thungdieng biang ha ka thaiñ,” ong ka Division Bench ba kynthup ïa u Chief Justice IP Mukerji bad Justice W Diengdoh ha ka hukum ba pynmih ha ka sngi Palei.
“Ngi pynsangeh ïa ka PIL tad haduh ka 2 tarik Nailur 2025. U Special Officer u dei ban nang pynkhreh ïa ka kaiphod hashuwa kane ka por,” la bynrap.
