Shillong, Nailar 18
Ha kine ki sngi ba mynta ki jingjia shah thombor bad kiwei kiwei de ki kam sniew ha ka Jylla ki la nangjur bad nang shyrkhei haduh katta katta, ha kaba ki briew ba thombor ruh kim shym la salia shuh wat ban leh ïa kum kine ki kam ruh wat haba shit haba shai.
Ha ka janmiet jong ka sngi Nyngkong ka 18 tarik u Nailar 2025 kawei ka jingjia kaba la pynpar ñiangkhriat ïa baroh ki briew, ha kaba kawei khynnah skul ba dang 16 snem ka rta ka la shah thombor ha ki arngut ki runar.
Kine ki runar ki la dung ïa katei ka khynnah skul da u thyrñia injek ba don ki kynja dawai bym lah ban tip, katba ka dang ïaid lynti ha ka thaiñ Jaïaw.
Haba ïakren bad ka Kmie jong kane ka khynnah ka la ïathuh ba ka khun jong ka, ka dang don ha lynti ban leit sha skul ha ka por 2 baje janmiet hynrei kynsan-kynsan ki arngut ki samla kiba shong da ka scooty ba pynïeng marjan ka ophis ka Bible Society ha Madan Student, Jaïaw, ki la pynïeng ïa ka bad nangta pat ki sa dung da u thyrñia injek na ka kti ka mon hashwa ba kin phet krad na katei ka jaka.
Ka la ïathuh ruh ba kine ki runar ki dei kiba la tap ïa ki durkhmat bad ym lah ban ithuh dur satia ïa ki.
Kumta ki la ïalam ïa katei ka khynnah mar-mar sha Dispensary ha Jaïaw Langsning hynrei namar ka jingbym don doktor, la ïalam noh ïa ka sha Dr.H. Gordon Robert Hospital, Jaïaw, ban phah sumar.
Ka kmie jong kane ka khynnah ka la ong ba ka khun mynta ka dang don hapdeng ka jingshah sumar bad ki dang ap ïa ka kaiphod jingtohkit ban lap ba kine ki runar ki la injek da ka jingkhleh aiu ïa kane ka khynnah.
