Nongpoh, Nailar 18
Ka kynhun jong ka Estimate Committee ka Meghalaya Legislative Assembly ka jylla kaba kynthup ïa u Chairman, Bah Mayralborn Syiem bad ki dkhot, u Bah Wailadmiki Shylla, MLA ka Jowai, u Bah Adelbert Nongrum, MLA ka North Shillong, u Remington G Momin MLA ka Rambrai Jyrngam, u Bah Charles Marngar, MLA ka Mawhati ha ka sngi Nyngkong, ki la hiar sha Nongpoh konstitwensi ban jurip ïa ar tylli ki projek ba sahteng, kiba kynthup ïa ka Industrial Training Institute (ITI) bad Polytechnic.
Kum ban shu pynkynmaw biang, kine ki ar tylli ki projek, kata ka ITI bad Polytechnic kiba la sdang ban pyntrei ha ka Raid Nongkhrah, Nonglyngdoh la bun snem, hynrei kat haduh mynta ruh ym pat lah satia ba pyndep na kiba bun ki daw.
Ha ka jingjurip nyngkong ïa ka ITI kaba la mang ha ka jinglut kaba T.1.21 klur kaba la thmu ban ai jinghikai ha ki saw tylli ki jait jinghikai ba kynthup ïa ka Electrician, Fitter, Mechanical Diesel bad Welder, la lap ba kane ka jaka, kala shu sah ïingjah namar ka jingbym pat lah ban pynbiang ïa ka surok, ka bording ilektrik bad kiwei kiwei de ki jingdonkam ba hakhmat. Halor kane ka bynta, na ka liang ka komiti kala bthah ïa ka tnat ba dei khmih ba ka dei ban shimkhia ba ïa kane ka projek dei ban pyndep ha ka por kaba biang.
Ha ka jingjurip ïa ka Polytechnic pat ka ban ai jinghikai diploma ha ka lain Interior Design, Beauty Culture and Cosmetology bad kiwei kiwei de, ïa kaba la mang ha ka jinglut kaba T.12.30 klur, kaba la lah ban pyndep ïa ka jingtei haduh 90 persen bad kaba la don jingkyrmen ban plie noh shen ha ki khyndiat bnai ki ban sa wan, ka komiti ka la bthah ïa ki ophisar jong ki tnat ba dei khmih ba ki dei ba shimkhia bad dei ban pyndep kloi ïa kane ka kam na ka bynta ka jingmyntoi jong ki samla ka thaiñ.
Shuh shuh, na ka liang ka komiti ka la ïoh ruh ban jurip ïa ka jingpyntrei ïa ka ophis treikam ba thymmai jong ka Umsning C&RD Block kaba dang sahteng haduh mynta mynne. Ha kane ka jingjurip la wan ban ïadon ryngkat ruh da u MLA ka Umsning, u Dr Celestine Lyngdoh ha kaba na ka liang ka komiti kala hukum ïa u kontraktor ba pyntrei ïa kane ka kam ba un pyndep noh ïa kane ka kam hapoh jong u bnai Naiwieng bad bthah ruh ïa ki ophisar ba dei khmih ba ki dei ban shimkhia ban pynthikna ba kane ka kam ka dei ban dep hashwa jong u bnai Naiwieng mynta u snem 2025.
Na ka liang jong u Bah Mayralborn Syiem, Chairman jong ka EC u la ong ba kane ka jingjurip ka dei kum shi bynta ban pynthikna bad buddien ïa ki projek kiba sahteng ha ka district ba kin ïaid shakhmat bad kum ka komiti kan shimkhia ban dang ïai peitngor ba kine ki projek kin ïaid shakhmat bad lah ban pyndep kham kloi khnang ba kan long ka jingmyntoi ïa ki samla pule, ki paidbah bad ki nongshong shnong ka thaiñ hi baroh kawei.
