Nongpoh, Nailar 18
Tang khyndiat por kynta hadien ba ki paidbah nongshong shnong ka jylla Meghalaya na Maikhuli, Ri Bhoi District ki la pynkhyllem ïa ki post ilektrik kiba la wan sieh beaiñ da ka Assam State Electricity Board (ASEB) ka jylla Assam, ka la mih pat ka jingïakulmar hapdeng ki nongshong shnong ka Meghalaya bad Assam ha katei ka thaiñ khappud kat haduh ba kala don ruh ka jingïa ktah kti bad ïapajut.
Kum ban shu kdew, ki paidbah ka shnong Maikhuli kaba hap ha ka jylla Meghalaya, ha ka step sngi Nyngkong, ki la leit ban pynkhyllem ïa ki post ilektrik kiba la wan sieh bad pynïeng beaiñ da ka ASEB hapoh u pud u sam jong ka shnong kaba don marjan bad ka pung shnong bad kaba dang hap pura hapoh ka jylla Meghalaya ha kine ki khyndiat sngi ba la dep.
La ïathuh ruh ba hadien katei ka jingpynkhyllem ïa ki post ilektrik ka ASEB, ki paid nongshong shnong ka Maikhuli, kila leit phai sha la ki ïing ki sem, hynrei tang hadien khyndiat por la don pat ki briew na ka jylla Assam kiba sdang ban wad daw bad leh phoi. Na ka liang jong ki paidbah nongshong shnong ka Maikhuli ruh tang mar ïa tip halor katei ka jingjia, ki la mih bad leit sha katei ka jaka, ha kaba ka la don ka jingïania bad poi haduh ka jingïakynrup marmet ha kaba katto katne na ki longkmie na Maikhuli ki la jot ki jaiñ phong na ka jingshah pajut bad shah kynrup ha ki longkmie bad shynrang ka jylla Assam.
Na ka liang jong ki bor pynïaid District na Meghalaya bad Assam tang mar ïa ïoh jingtip halor katei ka jingïakajia, ki la leit mar mar sha katei ka jaka ban tem ïa ka jingkynad bad lyngba ka jingshimkhia jong ki, la lah ban pynpra noh ïa ki paidbah kiba la bitar bad jan poi sha ka jingïaumsnam.
La ïoh jingtip ruh ba na ki bor pynïaid District na ka jylla Meghalaya bad Assam ki la rai ruh ban thaw noh da ka komiti pynïasuk lane kata ka ‘Peace Committee’ ban wanrah biang ïa ka jingshong suk shongsaiñ bad ka jingïa ieid hapdeng ki paidbah jong baroh ar ki jylla, kiba sah ha kitei ki thaiñ khappud.
