Jowai, Nailar 18
Ka lympung ïalehkai Super Division (Kelsiroy Pala Memorial) bad 2nd Division (Joybell Suiam Memorial Football Tournament) ba la pynïaid da ka Thadlaskeiñ Sports Association (TSA) ka la nangjam shaphrang ha ka lah sngi U Blei ha Wahïajer Multi Sports Complex.
Ha ka jingïalehkai 2nd Division, ka Ïawthymbleiñ bad Nongdhar ki la ïakhaid mar 1-1 kol. Ïa ka kol jong ka Nongdhar la thep da u Leading Shiwat (35), ka Ïawthymbleiñ ka la pynphai kylla lyngba u Bistar Lyngdoh (67).
Ha ka jingïalehkai kaba bud, ka Mainroad SC ka la pynliem noh ïa ka Niriang United lyngba ka shi kol ba la thep da u Saiñborlang Dkhar (57).
Haba phai sha ka Super Division, ka Lumphyrnai Sohphoh bad ka Mukhla Raij ki la ïakhaid mar 2-2 kol. Ïa ki kol na ka bynta ka Lumphyrnai Sohphoh la thep da u Sumar Suting (43) bad Dapyntngen Suting (61). Katba na ka Mukhla Raij la thep da u Davidson Ïawphniaw (47) bad Chandame Suna (71).
Ha ka sngi Ba-ar ka jingïalehkai ha ka 2nd Division, kan long hapdeng ka Dreaming SC Mupliang bad Madur SC ha ka por 10 baje mynstep, ka Ryntih Mynsngat bad United Ummulong ha ka por 12 baje mynsngi. Katba ha ka Super Division, ka Niriang SC bad Nongkhroh Rim ha ka por 3 baje nohphai sngi.
