Imphal, Nailar:
Ka la don ka jingïakhih ha Imphal, hynnin ka sngi, ban pyrshah ïa ka jingeh jong ki nongwan buhai shnong be-aiñ ha ki jylla jong ka thaiñ Shatei-Mihngi, ha kaba ki nongïakhih ki dawa ban ithuh kloi ïa ki bad ban beh noh shi syndon, ryngkat bad ki jingïada jong ka Riti synshar na ka bynta ki jaidbynriew trai ri trai muluk jong ka thaiñ.
Ïa kane ka jingïakhih la pynlong da ka NESO ha ka jingïatreilang bad ka All Manipur Students’ Union (AMSU).
Haba kren sha ki lad pathai khubor ha shilynter jong kane ka jingïakhih, u Assistant General Secretary ka NESO u W. Sanatomba u la ong ba ka jingthmu ba hakhmat eh ka long ban kyntu ïa baroh ar tylli ki sorkar Manipur bad sorkar pdeng ba kin tuklar bha ïa kane ka jingeh jong ki poiwir ba rung beaiñ da kaba ithuh bad beh noh kloi ïa ki.
U la kynnoh ba ka jingwan tuid ki nongwan buhai shnong ka la wanrah ïa ka jingjynjar ha ka jylla ha kaba ïadei bad ka jingbym ïahap jong ka synshar paidbah bad ka jingbym shongsuk ha ka saiñ pyrthei.
Da kaba ai nuksa, u Sanatomba u la kdew ba ka jaitbynriew Tripuri ka la kylla long ka jaitbynriew rit paid ha la ka jong ka jylla, ka Tripura, katba ka Assam ruh ka mad ïa ka jingkit kaba khia jong ka jingwan buhai shnong be-aiñ kaba heh.
U la bynrap ba ka Manipur ruh, ka dang mad ïa ki jingshah ktah kiba jur na ki nongwan buhai shnong kiba wan na Myanmar bad Bangladesh, bad u la kynthoh ba ka jingsdang jong ka jingïakynad kaba dang ïaid ha Manipur, ka don jingïadei bad kane ka mat.
Ban weng ïa ki jingeh kiba mih na ka jingwan buhai shnong be-aiñ, u la kyntu ïa ki bor ba dei peit ban pyntreikam ïa ka National Register of Citizens (NRC) bad dawa na ka Sorkar India ban ai ïa ki lad jingïada katkum ka Riti synshar ïa ki trai ri trai muluk jong ka thaiñ Shatei-Mihngi.
Shuh shuh u la ong ba ïa ka jingpynbeit pud ha Manipur dei ban leh tang hadien ba la dep pyntreikam ïa ka NRC.
Halor ka jingeh ha Manipur, u la kyrpad ïa ka sorkar pdeng ban pynbeit kloi ïa ka lyngba ka rukom treikam kaba pura.
