Moscow, Nailar:
Ka Russia ka la pyntip ba ki shipai jongka, ki la ioh siat pynjulor ïa ki 300 tylli ki drone jong ka Ukraine bad ki la ther kylla sha ki jaka buh ïa ki namding ‘Sapsan’ jong ka Ukraine, katba ka thma kaba jur hadpeng kine ki arliang ri, ka dang iai bteng hapoh ka nongbah Donetsk, ha kaba ki shipai jong ka Ukraine ki dang pyrshang ban ïakhun tyngeh bad ban tehlakam ïa ka jingleit hiar thma jong ki shipai ka Russia.
Ka tnat ïada ri jong ka Russia, ka la iathuh ba ki shipai jongka, ki la ïoh ïa ki jaka kiba kham biang hajan ka jaka sah jong u Zolotyi Kolodiaz, hapoh ka nongbah Donetsk, wat la ki jingbuh jingkheiñ jong ka Ukraine, ki pyni ba ki shipai jong ka Ukraine, ki la lah ban teh lakam ïa ka jingïaid lynti jong ki shipai ka Russia.
Ka tnat iada ri jong ka Russia, ka la iathuh ruh ba ka la pyndonkam ia ki liengsuiñ thma, ki drone bad ki ‘namding ban siat ia ki jaka buh ‘namding ‘Sapsan’ jong ka Ukraine ha kylleng ka ri.
