Mairang, Nailar 18
Ka Meghalaya Kho Kho Association (MKKA) ha ka 16 tarik mynta u bnai ka la pynlong ïa ka jingjied ïa ki rang bad ‘thei ïalehkai Kho Kho ha Eastern West khasi Hills District.
Ïa kane ka prokram ban jied ïa ki nongïalehkai ba don sap, la pynlong ha ka shnong Kynshi kaba dei shi bynta jong ka jingpynkhreh ïa ka National Games 2027 ha kaba lehse kane kan dei ruh ka sien kaba nyngkong ïa ka Jylla ban ïoh ïashim bynta ha kane ka jingïalehkai ha katei ka lympung.
Ha katei ka sngi la sakhi da ki phew ngut ki samla kynthei bad shynrang kiba la wan ban ïashim bynta ha ka jingpyrshang.
Haba pynpaw ha ki lad pathai khubor, u President ka MKKA u Bah Aibanrikupar Syiemlieh u la ong ba ka jingpynlong ïa kane ka prokram ka long ban jied ïa ki samla ba kynsai na ka District, khnang ban pynkhreh ïa ka National Games 2027.
Ula ong ruh ba ha kane ka jingpyrshang yn jied tang ïa ki khynnah samla kiba la 15 snem ka rta shaneng ha kaba kiba shah jied nangne kin ïoh ban shim bynta sa ha ka jingpyrshang kaba khatduh (final trial) ka ban long ha u Nailur mynta u snem.
Shuh shuh u la pynpaw ïa ka jingkyrmen skhem ba shibun ki khynnah samla kynthei bad shynrang kin mih shakhmat ban wan lehkai ha kane ka jingpyrshang kaba la pynlong ha ki district bapher bapher.
