Raphael Warjri
Haba bishar ïa ka shruh pynshong kyntien ha ka ktien Khasi, lah ban shem da kaba shai ba ym lah ban nujor bad ka ktien jong kiwei kiwei khamtam ka ktien phareng (English) namar ba ka rukom kren, rukom pule bad rukom thoh ka pher bak-ly-bak ha ba nujor bad ka ktien Khasi. Ka ktien Khasi ka dei ban don da ka rukom pynshong ktien lajong katkum ka rukom kren kaba dei thik ban lah sngewthuh wat kiba khlem pule dang-le ruh. Ki don ki ktien kiba dei tang ha ka kren ka khana bad ba ym dei ban pynrung ha ka thoh ka tar, kumta ym dei ruh ha ka pule dangle. Ka ktien phareng ka lah ban long tang ka marnongmuna (template) na ka bynta ban shna da ka aiñsohktien (grammar) Khasi lajong, kaba khlem don kano kano ka bynta ban ïahap bad ka rukom pynshong kyntien ha kiwei kiwei pat ki ktien. Ïa mynta ym pat lah ban tip ba lah ne ym lah ban pdiang ha ka ktien Khasi ïa ki ktien ba la thawhi, kata ka aiñsohktien ka ba mut ka aiñ ba pynïasoh ïa ki kyntien na ka bynta ban man ka synropktien (sentence). Na ka synropktien ne synroptien ban pynïar haduh ban man ka dkhotktien (paragraph) bad na ka dkhotktien haduh ban man kawei ka jynthoh kaba don ka ba don katto katne ki dkhotktien ha ka shi lynnong (chapter) lah ban pynwandur katkum ka kyrteng kaba kynthup katto katne ki lynnong ha kawei ka thup jynthoh kum ka kot. Kine baroh lada dei shibynta lane kyllum lang baroh dei ban shim da ka marnongmuna na ka ktien phareng.Kita ki marnongmuna ki lah ban long ka thohlyngkien (prose), surmyllung tienmyllung (poetry), pasohjlan (essay), pasoh (substance/ synopsis), atiartrei (article), khubor (news), bad kumta ter ter ba la jer kyllum kum ka jynthoh (script). Nalor ka rukom thoh ïa ki jynthoh ha ka kot, ynda la synrop lang ban shonkot kum kawei ka mar ban ioh pule kyrpang shisong ha kajuh ka thup la jer ka kot (book), kotdur (comics / comic book), kottipthuh (magazine) marsahnam (souvenir), kotkaiphot (journal) bad kumta ter ter. Nangta ia ki jynthoh kiba dei ha ki shlem pule shlem hikai (institutions) kham tam ha ki salonsari (university) ki long ka thohbniahsani (thesis), ka thohtihsani (dissertation) bad ki jynthoh ba dei na ka bynta ki durim durkhih (video, film, cinema) lah ban jer thohdurim ïa ka jynthoh kaba long kyllum ïa ka khana ha ka durim durkhih. Hynrei ïa kiwei kiwei ki bynta jynthoh ba dei na ka bynta u lamkynto (director) ban sngewthuh ïa ki dhara (scene) bad ki rukom kren ha ka durim da ka ktien briew lah ban ong tienkren (dialogue), thohdhara (screenplay) bad durdhara (storyboard).
Katba ka iktiar kaba dei ban pynskhem ïa ka jynthoh ïa ka ktien Khasi ym pat don haduh mynta, kumta lah ban khmih lynti tang ïa ka synjuk ki nongthohkot, Khasi Authors’ Society bad ka shlempule Khasi Department NEHU kum ka lyng-wiar ki riewtbit ban aibor na ka bynta ban pyndonkam ïa ki ktien thawhi ba thymmai. Kumta kane ka jynthoh ka long ka jingtyrwa ban kynshew ha ka thiar ktien Khasi thymmai, khamtam ha ka thoh ka tar, khnang ban nang roi shuh shuh ka ktien. Ha kaba pynksan ïa ki ñia halor ka nong-rim ba la thaw hi ne saiñ ktien thymmai lah ban batai sani kawei-pa-kawei kumne harum:
marnongmuna (template) : ka mar kaba long kum ka nongmuna ban pyni nuksa na ka bynta ban sngewthuh ïa ka dur ba shisha yn da la shna.
aiñsohktien (grammar) : ka dei ka aiñ ha ka thoh ka tar Khasi kaba pynïasoh ïa ki kyntien ban man ka ktien kaba sngewthuh katkum ka rukom kren, pule bad thoh Khasi paka.
synropktien (sentence) : ka synrop lang jong ki ktien ha ka shihud marsynthoh ka ba lah ban sngewthuh katkum ka rukom kren, pule bad thoh Khasi paka.
lynnong (chapter) : ka mut ïa ka lynnong na ka jynthoh ha kano kano ka kot.
dkhotktien (paragraph) : ka synrop ki iktien shihud shihud ba la pynshong ha kawei ka dkhot kaba lah ban sngewthuh ïa ka mat katkum ka rukom kren, pule bad thoh Khasi paka.
thohlyngkien (prose) : ka rukom thoh kaba sani ha ka rukom kaba kham bniah ka ba lah ban lyngkien palat ïa ka shisla ka kot bathoh.
surmyllung tienmyllung (poetry) : ka kyntien ne synrop kyntien kaba don la ki dkhot ktien ba ryntih ban man ka pasoh ka ba myllung ha ki kyntien ne ha ka sur shoh mynsiem na u myllung.
pasohjlan (essay) : ka jynthoh kaba don ka pasoh ha ka ïa ka phang ba la buh bad ka batai bniah bad jlan ka jynthoh palat ïa ka shisla arsla.
pasoh (substance / synopsis) : ka jynthoh kaba don ïa ka pasoh kaba lyngkot katba lah tang ban ioh kem ïa ka phang jong ka jynthoh.
atiartrei (article) : ka atiar kaba lah ban trei kum ha ka jynthoh ne tiar ne kyndon aiñ ki long hi kyllum ïa ki atiar ba trei lyngba ka jynthoh (news, magazine, journal article), atiar ba pyndonkam ha kano kano ka kamba trei (domestic, office articles) bad ka atiar aiñ kaba trei kum ka shnat ha ki kyndon aiñ, bad baroh lang ki kit jingmut ïa ka ktien phareng ‘article’ namar ban biang pura ki jingmut kum ha ka ktien ba dei ban pyndonkam katkum ka tairai.
khubor (news) : ka khubor te ka dei kaba la sngewthuh paidbah salonsar ban pathai lynga ki kotkhubor, ne kino kino ki lad pathai khubor ha ka imlang sahlang.
kot (book) : ka kot te ka dei kaba la pyndonkam barabor naduh ba sdang ka thohkot thohsla Khasi, kumta yn ïaineh kumba ka long. Lehse lah ban phiah ha ki katto katne ki bynta kum ka kotpule kothikai (textbook) kiba dei thik ki kot pule kot hikai ha ki shlem ba dei ban pule ne shah hikai.
