Khliehriat, Nailar 17
Ka kynhun Anti-Narcotics Task Force (ANTF) ha ryngkat ki pulit ka East Jaiñtia Hills, ki la ïoh ban kem noh ïa uwei u nongkhaïi drok uba dang wan na Churachandpur, Manipur sha Shillong bad ïoh ban kurup noh ïa u ‘heroin’ uba shongdor palat T.40 lak.
U Superintendent of Police ka EJH u Vikash Kumar, IPS lyngba u kyrwoh u la ong ba ha ka miet jong ka 16 tarik Nailar ka kynhun ANTF ka la ïoh ïa ka jingtip kaba thikna ha kaba ïadei bad uwei u briew uba mih na Churachandpur, Manipur ban wan sha Shillong da ka bos kit paidbah ha ryngkat u drok.
Kumta ki heh ka ANTF ryngkat ki pulit ka EJH ha ka 17 tarik Nailar ki la pynlong ka jingpynap shrip ha ka shnong Byndihati, EJH bad ha ka por kumba 2:15 nohphai sngi ki la pynïeng noh ïa kawei ka bos kaba don ïa u nombor AS01-JC-4999 kaba mih na Silchar ban wan sha Shillong bad ïoh ban kem noh ïa une u briew uba kyrteng u Isak L Joute, 26 snem rta uba dei na Madanrting, Shillong.
Ha ka jingtalasi hapoh ka kyndon NDPS Act ha ryngkat ka jingïadon lang ki sakhi ba laitluid, ki pulit ki la ïoh ban kurup noh 9 tylli ki synduk sabon kiba don haduh 91.86 gram u drok ‘heroin’ uba shongdor palat T.40 lak.
Hadien ki pulit ki la pynngat mukotduma pyrshah ïa u ha thanad Khliehriat hapoh ka kyndon NDPS Act bad ka jingtohkit ka dang ïaid shakhmat ban lapdien shuh shuh ïa kiwei pat kiba donkti.
