Agartala, Nailar:
Kumba la sakhi, la ong ba ka jylla Tripura kumba la sakhi da ki heh ba dei khmih, ki la ong ba ka la kiew ha kiba bun ki liang khamtam ha ka jingkyntiew ïa ka imlang ka sahlang.
Kaba hakhmat eh ka long ba kane ka jingkiew ka long na ka jingtreikam ki skhim sorkar ba la buh bad pyntreikam na ka por sha ka por.
Ki heh sorkar ki la ong ba hashwa ka jylla ka don hapoh ka jingïaum snam na ki kam pyntriem jong ki lehnoh, ka la paw ba ka la hiar ha ka jingbun jong ki kam lehnoh bad ki kam runar.
Ban pynskhem, ïa kane, la ong ba kane baroh ka dei naduh ka jingwan synshar ka seng BJP ha kaba ki kam pyntriem ki la troiñ ha ka jylla bad lajan ha baroh kawei ka ri.
Haba pynpaw ïa ka jinglong nongïalam ba pynkylla dur jong u Myntri Rangbahduh ka ri u Narendra Modi, uwei na ki heh sorkar u la ban jur ba ka kolshor saiñ hima sima ha India ka la kylla. “Ka sorkar BJP ka trei ban ai jingmyntoi ïa u briew uba khatduh ha ka imlang sahlang. Ka policy jong ngi ka long ban shakri ïa ki paidbah, ym tang ban ïoh bor. Dei na kane ka daw ba hadien 27 snem, ka BJP ka la thaw ïa ka sorkar ha Delhi, bad mynta ka sngi, ngi pynthikna ïa ka jingsynshar kaba bha ha Tripura”, u la ong.
Kumjuh ruh ka Tripura ruh ka la lait na ki jingteh jingkhum jong ka jingsynshar jong ka kynhun Left kaba la neh 25 snem, kaba la plie lad ïa ka sorkar kaba pynïaid ïa ka roi ka par hapoh ka BJP.
Haba kubur ïa ka jingngeit jong ki paidbah ha ka BJP, u la ong, “Ki paidbah ka Tripura ki la pyni ïa ka jingshaniah jong ki ha ka BJP da kaba ki la jied ïa arngut ki MP na ka jylla ha baroh ar tylli ki ilekshon Lok Sabha 2019 bad 2024. Kane ka jingjop ka pynpaw ïa ka jingkyrshan jong ki ïa ka jingthmu jong ngi na ka bynta ka roi ka par bad ka jingsynshar.”
Kawei na ki skhim ba la pyntreikam da ka sorkar ka dei ka Balika Samriddhi Yojana ha kaba kawei pa kawei ka khynnah kynthei kaba kha ha ka longïing kaba shah kynthup ha ka (BPL) kan ïoh ïa ka pisa ba la ïakut kaba T.50,000.
Ha ka por ba kan dap 18 snem, kane ka pisa kan kiew sha ka T.10 lak, kaba pynthikna ïa ka jingshngaiñ ha ka liang ka pisa tyngka na ka bynta ka lawei jong ka.
Kumjuh ruh hapoh ka Kanya Atmanirbhar Yojana yn pynbiang ïa ki 140 ngut ki samla pule ba tbit na ka Tripura Madhyamik Shiksha Parshad, CBSE, bad ICSE board da ki Scooter ban pynsuk ïa ka jingpule jong ki.
Ki dang don sa kiwei kiwei pat ki skhim kiba dang treikam bad ki ban sa pyntreikam kiba la tikna ba kin ai jingmyntoi 1a ki paidbah ha kiba bun ki liang bad kane kan sa nang kyntiew ïa ka jylla ha kiba bun ki liang.
Da ka jingkyrshan kaba khraw na ki paidbah, ki nongïalam ka BJP ki la pynpaw biang ïa ka jingkut jingmut jong ki ban pynïaid shakhmat ïa ka Tripura ha ka lynti jong ka roi ka par, ban pynthikna ïa ka jingsuk, ka roi ka par.
