Shillong, Nailar 18
U President ba rangbah ka Khasi Student Union (KSU) u Bah Lambok-starwell Marngar u la ong ba mynta ngi ïohi ba ha kane ka thaiñ dei tang ka Sorkar Assam kaba la shimkhia ban kyndang naphang ïa ki mynder, katba kiwei ki Sorkar ki dang ïoh thiah lyngngai.
Haba kren sha ki lad pathai khubor ha ka 18 tarik u Nailar 2025, ka sngi ba pynlong jingïakhih da kaba shong kyllaiñ mungor ha Khyndailad u Bah Lambokstarwell u la ong ba dang shen ka sorkar India ka la bthah ïa baroh ki Sorkar Jylla ban kyndang naphang ïa ki nong Bangladesh hynrei haduh mynta kim shym la patiaw, lait noh tang ka Sorkar Assam.
“Dang shen ki nong Bangladesh ki la rung beaiñ bad ban leh ruh ki kam runar bad dei halor kane ba na ka liang ka KSU bad ka NESO ka la mih madan” u la ong.
U Bah Lambokstarwell u la maham tyngeh ruh ïa ki ‘Dalal’ ki ba pynrung masi na India sha Bangladesh hynrei kaba shyrkhei ka long, ba ki don ki ‘Dalal’ kiba pynrung tuh ïa ki briew shapoh ka Jylla bad lada ka seng kan lap kan sa leh ïa kaba donkam.
“La ju ïakren naduh ki por ba mynshwa ba la donkam ban don ki aiñ kiba khlaiñ. La kha ïa ka MRSSA naduh u snem 2016 hynrei ka Sorkar kam shem la pyntreikam haduh mynta. Ngim tip ba la shu aidaw da kumno- kumno, hynrei ngi ïohi pynban ba ka pyrshang ban pyntreikam ïa kata ka MRSSA bad ki pyrshang pat ban kdat pynban ïa ka jingkitkhlieh ki kam shnong kam thaw, bad lada ka Sorkar ka kwah ban pyntreikam ïa ka MRSSA ruh khlem ki khyrdop talasi kam don jingmut”, la ong u Bah Lambokstarwell.
U la ong ba dei halor kane ka bynta ba ka seng ka la ju ïai pynkynmaw sha ka Sorkar ba dei ban pynjur ka jingbuddien jong ka ba ka ILP ka dei ban urlong hapoh ka Jylla jong ngi.
Shuh shuh u la ong ruh ba ka jingdon ki BSF ban ïada ïa ki jaka khappud kam pat long kaba skhem haduh katta katta ban tehlakam ïa ka jingwan rung kiba nabar, hynrei ka dei ka aiñ ka ba lah ban tehlakam ïa kita kiba wan rung beaiñ shapoh ka Jylla.
“Kan treikam ne kam treikam kita ki aiñ ka seng ka kren da kaba shai ba ka jingkyndang bad ka jingkthong jong ngi ïa ki mynder ri ha kylleng ka ‘Bri U Hynniewtrep’ ngin nym sangeh lano lano ruh” la bynrap u Bah Lambokstarwell.
