Shillong, Nailar 18
U Myntri Rangbah ka Jylla, u Conrad K. Sangma ha ka Lah Sngi U Blei u la plie ïa ka ‘STEM Fusion’, ka ‘Workshop’ ba shi sngi bad ka ‘Student Exhibition’ , kaba la pynlong da ka North East Centre For Technology Application and Research (NECTAR) bad ka Smart Village Movement, IISER Pune ha State Convention Centre, Shillong.
Ha ka jingkren, u Sangma, haba pynkynmaw ïa ki sngi jong u kum u khynnah pule, u la ong ba ka don beit ka jingtieng ïa ka sobjek ‘Science’ bad jingkheiñ bad bynrap, “Ka la don ka jingshimkhia palat haba phai sha kine ki sobjek bad kam shym la long kaba sngewtynnad ban pule ïa ka ‘Science’ bad ka ‘Maths’ bad nga tikna ba lada kyllum lang ïa baroh, kata ka dei ka jingsngew jong kiba bun kiwei pat wat mynta, bad ka long kaba sngewsih.”
U la ong ruh ba ka dei ka jingpyrshang jong ka Sorkar bad ki kynhun seng kum ka NECTAR bad ka Smart Village Movement ban wad ïa ki lad ki lynti ban pynlong ïa ka ‘Science, Technology, Engineering and Mathematics’ (STEM) bad khamtam ïa ka ‘Science’ bad ‘Mathematics’ kiba sngewtynnad, kiba kwah ban ïadon bynta lang, bad kiba khring.
“Kane ka dei ka sienjam ban pynbha ïa ka jinglong-jingman baroh kawei bad ban pynrung ha ki khynnah ïa ka jingkwah tip bad ka jingsngewtynnad haba ki pyrkhat shaphang ka STEM,” u la ong.
U la ai jingmut ruh ba dei ban don shuh ïa kiba kum kine ki ‘Lab’ bad ka ‘Lab on Wheels’ lane ki ‘Mobile Lab’ na ka bynta ban kham kner sha ki khynnah pule.
“Ngi la sdang ïa kum kine ki jingthmu ha ka Jylla hapoh ka prokram ‘Smart Village’ bad ka jingkmen kaba khraw ka mih hapdeng ki khynnah kiba shu wan na ka bynta ban leh ïa ki jingpyrshang bad wad bniah,” u la ong.
U Myntri Rangbah u la kyrshan jur ruh ïa ka jingdonkam ban don ïa ki jingïakob ‘Science’ bad ‘Maths’ bad ong, “Nga kyntu ïa ka tnad Pule-Puthi ban don ïa ki prokram ba kyrpang ha ki skul ban leit jngoh ïa kine ki ‘Science Lab’ bad ki ‘Centre’ bad ban don ruh ïa ki jingïakob ‘Science’ bad ‘Maths’ ha ki kyrdan bapher-bapher ki ban kut pat ha ka jingïakob ha ka kyrdan jong ka Jylla.”
Haba pynkut ïa ka jingkren jong u, u Myntri Rangbah u la ong, “Ngim lah ban khmih la ka jong haba ïadei bad kiei-kiei, ngi hap ban sngewthuh ba ngi trei ha ka basa-jingim bad lymda ki jinglong-jingman ki ïa beit bad ïasoh iwei-ïa-iwei pat, ka prokram kam lah ban long kaba jop,” bad ban jur halor ka jingdonkam jong ki nongshim bynta bapher-bapher ban ïawan bad ïatreilang.
Shuh shuh u la kyntu ïa ka tnad pule-puthi, ka NECTAR, ki nongseng kam seng jam lem bad ki paralok bapher-bapher ba kin ïawan lang bad ban thaw shuh ïa kum kine ki ‘STEM Lab’ khamtam ha ki kyrdan ba sha trai.
Ban pynkmen shuh-shuh hapdeng ki khynnah pule kiba don ha katei ka sngi, u Myntri Rangbah haba plie ïa ka ‘Science Exhibition’ u la pynbna ïa ka khusnam song pisa kaba T.2 lak na bynta ka khusnam banyngkong, T.1 lak na bynta ka khusnam ba-ar, T.50,000 na bynta ka khusnam ba-lai bad T.10,000 na bynta kawei-pa-kawei ka skul/kynhun kaba ïashim bynta.
U la pynbna ruh ba yn jied ïa katto-katne ki projek ba la pyni da ki khynnah pule bad na ka liang ka Sorkar kan bei tyngka ïa kita ki projek.
