Shillong, Nailar 18
Ka Meghalaya Cycle Association (MCA) ka la ïaid shakhmat na ka bynta ban ïoh sei madan ïa la ki samla ka Jylla kiba don ïa ka sap ñÏah saikil, ban mihkhmat sha ka lympung ïalehkai 39th National Games kaba la thmu ban pynlong ha u snem 2027 ha kane ka Jylla.
Kane ka synjuk ka la dep ban pynlong ïa ka prokram jied nongñiah saikil ne ka selection trial na ka bynta ka MTB Cross Country ha ka 15 bad ka 16 tarik mynta u bnai ha phyllaw jong ka skulbah NEHU ha kaba la wan shim bynta da kumba 50 ngut ki nongñiah saikil kiba la wan na ri lum Khasi, Jaiñtia bad na Garo Hills.
Hadien kane, ka synjuk ka la pyntip ba kan pynlong biang ha ka 2 tarik u Risaw mynta u snem ha kane ka prokram jied nongñiah saikil ha kaba ïadei bad ka jingïakob jong ka Road Race na ka bynta ki samla kynthei bad shynrang ha ka rta kaba 17 haduh 25 snem bad yn bynrap lang bad ka jingpyrshang (trial) na ka bynta ka road bike.
Haba ïadei bad kane, la ïoh ruh ïa ki jingkren na u President ka synjuk u Bah Lening Bareh ryngkat ka jingdon lang u Jazcinth Lywait, General Secretary bad u Mikhim Sangma (Coach), ha kaba u la khot bad wer ïa baroh ki samla ha ka rta 17 haduh 25 snem la ki lah ban dei ki bym ju ñiah saikil ruh hynrei ki lah ban dei ki nongïalehkai phutbol, ki nong mareh marathon bad ka synjuk kan pynbiang lut ïa ki tiar jingdonkam na ka bynta jong ki.
