Khliehriat, Nailar 18
Ka Lumshnong YWSC ka la long ka lahduh ha ka Second Division Football Tournament ba la pynïaid da ka East Jaiñtia Hills District Football Associa-tion (EJHDFA), hadien ba ka la lah ban pynliem noh ïa ka Khliehriat YWSC lyngba ka ‘tie-breaker’ da 4-3 kol ha ka jingïalehkai phainal kaba la long ha ka lah sngi U Blei ha madan ‘artificial turf’ Diengshyn-rum, Khliehriat.
Haba phai sha ka jingïalehkai jong ka kylla step bad kylla miet, ka la long kaba itynnad ha kaba ki rangïalehkai jong baroh ar kynhun ki long para ba ïabiang bor bad ym shym la don ba lah ban thep kol.
Hadien kane la rah ïa ka jingïalehkai sha ka ‘extra time’ bad hangne ruh ka jingïalehkai ka long ïaryngkat bor bad ym shym la lah ban pynkhih jar. Dei ha ka jingïashut ïa ka ‘tie-breaker’, ka Lumshnong YWSC ka la tam da 4-3 kol ïa ka Khliehriat YWSC bad ban khur syndon ïa ka jingjop.
Ïa ki khusnam pisa bad ki trophy sha kitei ki kynhun la sam da u kongsan u Tbn. Grimlang Dkhar ha ka jingdonlang u symbud kongsan u Bah Moses Swer, u Dolloi ka Elaka Narpuh u Bah Manbha Kyndoh, nalor ki nongïa-lam bad dkhot nongkitkam ka EJHDFA.
Ïa ka nam Player of the Match la khur da u Skhemborlang Rupai jong ka Lumshnong, ‘Top Scorer’ ka leit sha u Arlangki Sutnga na ka Khliehriat West, Best Goalkeeper sha u Bobby-son Nongtdu jong ka Lumshnong bad Player of the Tournament sha u Rida o Rupai jong ka Lumshnong YWSC.
Ha kane la sngi la don lang ruh u Myntri ka Sorkar Jylla bad uba long u MLA ka Khliehriat u Bah Kyrmen Shylla, ki MDC ka JHADC ba kynthup ïa u Bah Krison Langstang bad ka Kong Violet Lyngdoh.
