Katba nangmih ki sngi bad nangïaid ka por, ki jingsniew kiba har-rukom ruh ki la nangjur bad kynrei bha kat shaba phai, la ka dei ki kam tuh kam thiem, kam leh be-ijot ne kiwei kiwei ki kam runar. Ka jingjyllei jong ki kam sniew katkum ka jingsngewthuh ka dei namar ka jingjyllei palat jong u drok uba la pynngam ïa kiba bun ki samla. Ka jingmih paw jong ki kam sniew ka la wanrah ruh ïa ka jingbym shngaiñ shuh ha ka leit ka wan khamtam ïa ki khynnah bad kynthei, watla ka dei hapoh ki shnong ki thaw ruh kumjuh. Ym lah shuh ban shaniah ïano ïano. Balei haduh katne, shano shuh ka jingïatiplem ne ka jingïa burom para briew.
Dang ha ka sngi Nyngkong, ngi la sakhi kawei na ki kam runar kaba la pynpar ñiangkhriat ïa baroh, ha kaba kawei ka khynnah skul kaba dang 16 snem ka rta, kala shah thombor ha ki arngut ki runar, kiba la dung ïa ka da u nar injekshon ba don ki kynja dawai bym lah ban tip, katba ka dang ïaid lynti ha ka thaiñ Jaiaw. Shano shuh kata ka jingshngaiñ ha ka leit ka wan. Baroh baroh, ngi ju sngew shngaiñ haba ngi leit ngi wan khamtam hapoh ki shnong ki thaw lajong. Hynrei lada kum kine ki jingjia, ki la sdang ban paw pyrthei, te hangno ki kmie ki kpa kin don ka jingsngew shngaiñ ïa la ki khun ki kti, haba ki mih na la ki ïing ki sem.
Ki kam tuh kam thiem ruh ki dei kawei na ki jingeh kaba la wanrah ïa ka jingbym long shngaiñ shuh ïa ki nongshong shnong mynta. Ngi ju sakhi ba ki briew kiba leh ïa kum kine ki kam runar kim ju salia ne don jingtieng satia. Balei ban ïa kwah suk palat ïa kaei-kaei ka bym dei ka lajong. Balei ym lah ban pynshitom ïalade ban trei ban ktah bad kamai la ka hok da kaba pynmih umsyep hynrei ym ban shu leit knieh jyndat ïa ka umsyep jong kiwei. Ka pyrthei ka la nangïaid sha ka juk jong ka jingshai hynrei haba phai pat sha ka jinglong jingman jong kum kine ki briew, i kumba ngi dang hiar bad rung sha ka jingdum, ngim tip shuh balei ki wan jia kumne.
Ngi donkam ïa ka aiñ kaba khlaiñ bha ka ban lah ban tehlakam ïa kum kine ki briew. Kumba ka long mynta, ka jingtlot palat jong ka aiñ, ka i pynban kum ka lad jong ka jingpynshlur ïa ki kam sniew namar haba ïoh ban kem ïa ki nongtuh, bunsien la lap ba tang hadien shisngi ne arsngi ki la lait noh. Kumjuh ruh lada ïoh bat ïa ki nongdih drok ne nongkhaïi drok ba rit baria, ju shem ba tang hadien katto katne sngi ki la lait noh. Na ka liang jong ki pulit ki ju trei shitom ban ïaleh ban khanglad ïa kum kine ki jingsniew kiba la pynduh thiah duh dem ïa ki nongshong shnong. Watla na kawei ka sngi sha kawei pat, la ju kem ïa ki briew kiba leh ïa ki kam runar hynrei ka jingkylli ka mih balei pat ki nangkynrei kumne, ha ka jaka ba kin kham duna. Hato ngi la don ha ka juk jong ka jingkwah tang ïa ka suk, la ka dei ha ka kamai kajih, ha ka trei ka ktah ne ha kino kino ki kam ruh kumjuh.
Ka long shisha kaba la eh bha ha kane ka juk kaba mynta ban sneng ban kraw ïa la ki khun ki kti. Kawei na ki daw ka dei ruh namar ka jingjur palat jong ki kor ‘social media’ kaba la ktah shi katdei eh ïa ki jingmut jingpyrkhat jong ki khun samla bad ngi shem ba lada ym nang ban pyndonkam ha ka rukom kaba dei, bunsien ka lam beit sha ki kam sniew. Kumta ngi donkam ban peitngor bad phikir bha ïa ka ïaid ka ïeng ki khun bad ruh ban ïaleh ban sngewthuh ïa kaei ka jingkwah bad jingpyrkhat ka jong ki.
