Khliehriat, Nailar 17
Ka kynhun Anti-Narcotics Task Force (ANTF) ha ryngkat ki pulit ka East Jaiñtia Hills District ki la ïoh ban kem ïa lai ngut ki suba nongkhaïi drok ba shyrkhei kiba dei ki kynthei bad ïoh kurup ïa u drok ‘heroin’ uba shongdor haduh palat T.4 klur.
U Superintendent of Police ka East Jaiñtia Hills District u Vikash Kumar, IPS lyngba u kyrwoh u la ong ba ha ka miet 16 tarik Nailar ha ka por kumba 11 baje mynmiet, ka ANTF bad ki pulit ka East Jaiñtia Hills ki la ïoh jingtip ha kaba ïadei bad ki lai ngut ki suba nongkhaïi drok kiba dei ki kynthei kiba wan ha ryngkat u drok na Churachandpur, Manipur sha Shillong da ka kali paidbah.
Kumta mardor ki la pynlong ka jingpynap shrip hapoh Umkiang Patrol Post kaba hap hapoh Lumshnong PS, bad ha ka por kumba 11 baje mynstep jong ka 17 tarik Nailar kane ka kynhun pulit ka la bat noh ïa kawei ka kali Maruti Suzuki S-Presso bad bat noh ïa kine ki lai ngut ki kynthei kiba la tip kyrteng kum ka Kimnei (33), ka Dimkhothing (47) bad ka Ngaiting (40 snem rta), baroh kiba dei na ka shnong Khongjom kaba hap hapoh Tengnoupal PS jong ka jylla Manipur.
Ha ryngkat ka jingïadon lang ki sakhi ba laitluid la pynlong ïa ka jingtalasi hapoh ka kyndon 50 jong ka NDPS Act, ha kaba la ïoh ban kurup noh ïa ki saw tylli ki pla kiba don haduh 80 tylli ki synduk sabon ba la thep ïa u drok ‘heroin’ uba khia haduh 961.33 gram bad uba shongdor haduh palat T.4 klur.
Une u heh pulit u la ong ba kine ki kynthei la suba jur ba ki dei ka bynta jong ka kynhun runar khaïi drok kaba heh bha na kawei ka jylla sha kawei pat bad kaba ju pynpoi ïa u drok na Manipur sha Shillong bad sha kiwei pat ki bynta jong ka ri India.
Hadien la pynngat mukotduma pyrshah ïa kine ki laingut hapoh thanad Lumshnong ha ki kyndon ka NDPS Act bad ka jingtohkit ka dang ïaid shakhmat ban lapdien shuh shuh ïa kiwei pat ki briew kiba donkti.
Nalor kata la kyntu ruh ïa kino kino ki briew kiba don jingtip ha kaba ïadei bad kiwei pat ki runar kiba donkti ha kane ka kam bymman ba kin pyntip mardor sha ki thanad ha kaba yn buhrieh ïa ki kyrteng jong ki bad ban ai khusnam ruh.
