Shillong, Nailar 18
Ka jingïakhun ha ka kylla kaba nyngkong (first round) jong ka lympung ïalehkai Shillong Premier League ka la poi sha kaba kut ha kaba ka Rangdajied United FC bad ka lahduh jong ka aïom ba la lah ka Shillong Lajong FC ki la ïasam mar shi point hadien ba kim shym la lah ban thep kol haduh kaba kut ka jingïalehkai ha ka lah sngi U Blei ha SSA Stadium kaba ha First Ground, Polo.
Ban shu ïa sngap ïa ka nam bad ka kyrteng jong kine ki ar kynhun, lah ban ong ba u paidbah nongpeitkai, un jin da la hun ka mynsiem ba kine ki ar kynhun kin pynmih madan ïa ka sur ïalehkai kaba itynnad.
Marsien ïa sdang ka bol ka la kham poi bha na kawei ka kut sha kawei pat, hynrei ha kaba kut, ki rangïalehkai na baroh ar kynhun, kim shim la lah pat ban pynurlong ïa ki kabu ksiar ba la wan sha ki phang ka kol jong ki, da kaba pynkynmaw ba ka dur ka dar jong kane ka lympung mynta ka samoi ka long tang shi kylla (single leg).
Lah ban pynkynmaw ba ka Shillong Lajong ka la lah ban pynliem teng ïa ka Rangdajied ha ka Meghalaya State League bad dang shen ha ka Durand Cup.
Pynban ha kane ka jingïakhun, baroh ar kynhun ki pynpaw ba kim lah satia ban thep kol, katno tam lei lei haba ki rangïalehkai ka Lajong kum ki jong u Deibormame Tongper, Yohaan Benjamin bad u Babysunday Marngar kim shim la lah ban don bad la ka kynhun, katba na ka liang ka Rangdajied ka donkam ïa u rangïalehkai kum u Owanijuh Pajuh ban lamkhmat ha ka bynta kaba shakhmat.
Ki kato katne ki kabu ksiar kiba la wan ban mihpaw ha katei ka janmiet hapdeng kine ki ar kynhun ka long ba ka Lajong arsien ka la duh ïa ki kabu ksiar ban pynkhih jar hadien ba ka bol ka la dei ïa u diengkol, nangta ka ‘free-kick’ lyngba u Manbhakupar Ïawphniaw. Ka Rangdajied ha kaba sdang eh ka kylla miet ka la shah khanglad noh ha u rangapkol ka Lajong u Wanteilang Malngiang, uba sa shisien joit u la ïeng ban kyrda ïa ka bol ba la shut jam da u Menangpyndap Khongjee.
Shuh shuh ka Lajong ka la pynlehnohei ruh ïa ki kabu ksiar lyngba u Firstborn Khongsit bad Ricky Kharkongor, ha kaba ka bol ba ki la shut ka la ïaid shalor na u dieng kol.
Da kumta kane ka jingïakhaid, kan dei artad kaba kut jong ka kylla kaba nyngkong ïa baroh ki kynhun, kaba na ki san tylli ki jingïakhun kiba la dep, lai tylli ki kynhun ki la ïoh ïa la ki lai ‘point’ kiba kynthup ïa ka Mawlai, Nangkiew Irat bad ka Malki SC, katba saw tylli kiwei pat ki la ïoh mar shi ‘point’ kata ka Langsning, Mylliem, Rangdajied bad Lajong, katba ki artylli ki kynhun ki bym shym pat la lah ban khur ‘point’ ki long ka Sawmer bad ka Laitkor.
Ka jingïakhun ha ka sngi Balang kan long hapdeng ka Nongrim Hills pyrshah ïa ka Sawmer ha ka por 4:30 nohphai sngi.
