Shillong, Nailar 18
Ka Khasi Student Union (KSU) ha ka 18 Tarik u Nailar 2025, kala pynlong da ka jingïakhih da kaba shong kyllaiñ mungor ha Khyndailad.
Ka sienjam ba ka Khasi Student Union (KSU) ka la shim ïa kane ka jingïakhih ban shong kyllaiñ mungor ka dei ban ïa snohkti lang bad ka rai jong ka NESO kaba la pynbna paidbah ban pynlong da ka jingïakhih shong kyllaiñ mungor ha baroh ki Nongbah jong ki Jylla Shatei Lammihngi.
Kane ka jingïakhih ka dei kum shibynta ban pynsngew sha ki Sorkar Jylla bad ruh sha ka Sorkar Pdeng, ban tehlakam ïa ka jingrung kyrthep ki poiei ha ka thaiñ Shatei Lammihngi, da kaba dawa ban shna ïa ki aiñ ban pyrkhing ïa ka jingrung laitlan ki poiei.
Ha kane ka sngi ka jingïakhih shong kyllaiñ mungor jong ka KSU, la wan ban kyrshan lang ruh da ka NESO, ka HITO nalor kiwei kiwei de.
La ïohi ruh ba ki dkhot ka seng ki la rah ryngkat ki plakad ban dawa na ka Sorkar ban ïada ïa ki khappud, ha kajuh ka por ban shna ïa ki aiñ kum ka Inner Line Permit (ILP).
Ha kine ki plakad la thoh ïa ki kyntien kiba ong, “Ka Sorkar India kam suidñiew ïa ka im ka ïap ki Khasi”, “Thaw aiñ tehlakam mynder noh kloi ïoh lap ba kulmar ka basa khoi”, “Pynurlong noh ïa ka ILP”, bad kiwei kiwei de ki jingdawa jong ki dkhot ka seng.
Haba kren sha ki lad pathai khubor na ka liang u Bah Samuel B Jyrwa, Chairman ka NESO, u la ong ba ka jingïakhih da kaba shong kyllaiñ mungor ka long ban pynsngew sha ka Sorkar Jylla bad ka Sorkar Pdeng ba kan shim ïa ki sienjam kiba tyngeh ban ïada ïa ki rit paid kiba shong ba sah ha ki Jylla shatei lammihngi.
“Ka jingwan rung ki bar jylla ne ki bar ri sha ka thaiñ shatei lammihngi ka la nang jur. Ki trai ri trai muluk ki la kylla long ki rit paid ha la ka jong ka ri bad ka daw ka dei beit na ka jingbym don ïa ka mon naduh ki por ba mynshwa ka ban tehlakam ïa ka jingrung kyrthep ki bar jylla”, la ong u Bah Samuel.
U bah Samuel u la ong ruh, ba ka Sorkar Jylla haduh mynta kam pat pyntreikam bha ïa ka MRSSA bad lada ka sorkar ka pyntreikam ïa ka MRSSA haduh ban da ïoh ïa ka ILP kan long ka jingïada ïa ka jylla.
Haba ïadei pat bad ka jingdon ki trai jylla ki ba ju ïarap ban pynrung tuh ïa ki nong Bangladesh ban wan shapoh ka jylla u Bah Samuel ula ong, kine ki briew ki dei ban tip ba kane ka kam ka long ka jingpynrung ïa u bseiñ hapoh ka ïing lajong bad ynda u la syaid lashai un sa puh kylla.
Nalor kata, ula ong kine ki hap ban sngewthuh ba kim dei ban ri ïa ki seiñpuh hapoh ki ïing jong ki.
