Ha ka jingiohi jongnga u bar Jylla u wan na bun ki lad ki lynti ban ioh rung hapoh ri Khasi. Uba bun hi u wan da ki Kali lyngba ki surok bad ki liengsuiñ (Eroplane tang khyndiat eh kiba wan da ka kjat ki lah ban ioh rung lyngba ki khappud ba marjan bad kiwei kiwei ki ri.
Hato ïa kine ki lynti ki syngkien khappud ruh ngin khang noh khnang ban ym ioh lad shuh u bar jylla? Haba ïa ka lynti Rel ngim shah bad ai lad ba kin wan hapoh Ri Khasi. Namar bun ki shim ba ka Rel ka wanrah bun u mynder namar ngi lah ban ithuh ïa ki ha ki station ba ki hiar. Nangta u wan ym tang na ki lynti Rel bad Kali u wan lyngba de na ka shongkha shongman, u wan lyngba ki University, u wan na ki kam sorkar bad ki kompani. U ioh rung hapoh ka ri jongngi. Balei u wan hapoh ri jongngi, namar u wan wad kam bylla ba bun ki kam bylla hapoh ri jongngi. U wan trei surok bad wan shna ïing shna sem, wan tih dewiong bad kiwei kiwei lyngba ki kontraktor ba ki ai bylla ïa ki ba kin trei ïa ki kam bapher bapher. Kumta ka long kaba eh ïa ki bar jylla ban khanglad ban wan rung hapoh ka ri jongngi. Namar dei ki trai shnong trai muluk kiba ai kam ai jam ai bylla ïa ki ha ki jingtrei jingktah ha kylleng ki jaka ka Bri u Hynñiewtrep. Kane ka long ka daw ïa u bar Jylla ban ioh rung suk hapoh ka ri Khasi jongngi.
C. B. Iawphniaw
