Shillong, Nailar 19
Ki nongïalehkai jong ka ri India ki la ai jingïaroh ïa ka National Sports Governance Bill 2025 bad ka National Anti-Doping (Amend-ment) Bills 2025, kiba la mynjur da ka Ïingdorbar Thawaiñ (Parliament) ha ka 12 tarik myna u bnai.
Kum ki nongïalehkai, ki coach, ki nongpynïaid ïa ki jingïalehkai bad kiwei ki la ai jingïaroh ïa ka kum ka jingpynkylla kaba la slem bha ban pynkhuid ïa baroh ki kynrum kynram ha ka rukom pynïaid ïa ki synjuk ïalehkai bad ban ïada ïa ki jingmyntoi jong ki nongïalehkai.
Na ka liang u Myntri ka tnat ïalehkai ka Sorkar Pdeng u Dr. Mansukh Mandaviya haba kdew ïa katei ka National Sports Gover-nance Bill, 2025 kum ka jingpynkylla kaba bniah tam ha ka rukom pynïaid naduh ba la ïoh ïa ka jinglaitluid, kane ka aiñ kan ïarap ban pynïaid ïa ki synjuk ïalehkai jong ka ri ha ka rukom kaba khuid bad kaba lait na ki kam bamsap.
Napdeng ki mat ba kongsan bapher bapher, kane ka Bill ka pynïahap ïa ki kyndon pynïaid ba kongsan bad ki aiñ jong ka Olympic bad Paralympic, ban pynthikna ba ki synjuk ïalehkai jong ka ri India kin treikam katkum ki rukom treikam ba bha tam jong ka pyrthei. Kane ka jingbud ryntih kam ïada tang ïa ka India na ki jingpynjari jong ki ri ka pyrthei, hynrei ka pynkhlaiñ ruh ïa ka jingthmu jong ka ri ban pynlong ïa ka Olympic ha u snem 2036.
Ki nongrim ba kongsan jong ka Sports Governance Bill ki kynthup ïa ki kyndon jong ka rta & ka por treikam, kaba kdew ba ki nongkitkam ki dei ban don hapdeng ka rta 25 bad 70 snem. Ka jingpynjlan ka dei na ka bynta kito kiba don ha ka rta 70-75 snem ka don tang lada ki kyndon jong ki kynhun ïalehkai pyrthei ki ailad. Ki president, ki secretary bad ki treasurer ki lah ban shakri haduh lai sien jong ki saw snem ba la buh.
Kawei pa kawei ka Executive Committee jong ka National Sports Federation ka dei ban don ym duna ïa ka saw ngut ki dkhot kynthei, arngut ki nongïalehkai kiba kynsai, bad arngut ki dkhot ba la jied da ka Athlete Commission. Ki kynhun ïalehkai ba la ithuh mynta yn kheiñ kum ki bor synshar paidbah katkum ka RTI Act, kaba pynthikna ba ki paidbah kin ïoh ïa ki rekod kiba ïadei bad ki kam bad ka jingai pisa jong ki. Ka National Sports Election Panel kan pynïaid bad buddien ïa baroh ki ilekshon jong ki synjuk ïalehkai hapoh ka ri bad ha ka Indian Olympic Association (IOA), ban pynthikna ïa ka jinglong ryntih ha ka rukom pynïaid. Ha ki khep ba don ka jingthud ha ka rukom pynïaid, ka National Sports Board ka lah ban thung ïa ka ‘ad-hoc committee’ ka ban pynïaid na ka bynta hynriew bnai.
Kawei na ki aiñ ba kongsan jong kane ka bill ka dei ka ‘Safe Sport Policy’, kaba ïadei bad ka jingpdiang ïa ki rukom ïada ïa ki nongïalehkai, bad ki lad jingïada na ka jingshah lehbeiñ kynthup ïa ki shynrang, ki kynthei, bad ki khynnah kiba dangrit.
