Shillong, Nailar 19
Ka Hynñiewtrep Youth Council (HYC) Wahlang 9 Kyntoit Circle ka la dawa jur na u Superintendent of Police (SP) ka East Khasi Hills u Bah Vivek Syiem ban pynshitom da kaba tyngeh ïa u Bah Arboklang Kharngi, Bah Batskhem Rani, Bah Kitnehlang Kharngi bad ïa u nongïalam lynti u Bah Rangboklang Warjri, kiba thmu pynïap (kumba la ïohsngew ha ka durkhih) ïa uwei u rangbah uba na ka shnong Mawkneng ba la tip kyrteng u Bah Banteilang Jaraiñ.
Ha ka kyrwoh ba ka seng ka la phah ba kane ka jingjia ba thmu pynïap kitei ki briew ïa u Bah Banteilang Jaraiñ kumba la ïoh sngew ha ki durkhih ba la lum thup ka dei ha ka 18 u Nailar, 2025 ha ka nohphai sngi ha ka shnong Mawkneng dong Wahstew. Kine ki briew ki la kit ïa u Bah Banteilang Jaraiñ ha kawei ka kali Maruti sha kawei pat ka jaka ban pyndep ïa kata kaba ki thmu hynrei la ïoh ban pyllait im noh ïa u da ka VDP Mawkneng.
Ka seng ka la kdew ba kine ki briew ki la ktah kti ruh ïa uwei na ki samla ba la tip kyrteng kum u Wankyrshan Khasaiñ uba thmu ban pynjai-jai ïa kine ki briew kiba thmu leh kam sniew bad kine ki briew ki la tim sih tim sang ruh ïa ki longkmie kiba don hangta hakhmat ki khynnah rit.
“Kumba la paw ha ki lad pathai khubor ba ki la kit ïa u Banteilang Jaraiñ ha ka kali Maruti 800 kaba don ïa u ‘Registration Number’ ML05-E-0641 ban thmu leh sniew sha kawei pat ka jaka. Kumta ngi kyrpad ïa phi ba phin kurup (seize) noh ïa kane ka kali bad ym dei ban pyllait katba ym pat dep ka jingtohkit,” la ong ka kyrwoh na ka seng.
Ka seng ka la kyrpad ruh ïa u SP ban tohkit bniah ïa u Rangboklang Warjri la u leit ne-em bad kine ki briew da kato ka juh ka kali ba la kit ïa u Banteilang Jaraiñ bad lada lap ba u don lang, ka seng ka kyrpad ban pynngat ha ki juh ki kyndon aiñ ïa u ruh kumjuh.
Shuh shuh ka la ong ba dei ban thwet bad wad ïa kiwei pat kiba thmu ïadonktilang ha kane ka kam thrang snam bad ban pynshitom ruh ïa ki katkum ka aiñ. Da kaba kyrpad ruh ba ka tnad pulit kan pynkloi ka jingtohkit bad ban pynngat mukotduma ïa kine ki briew.
Kumta khnang ba ka shnong Mawkneng bad kiwei ki shnong ba marjan kin im suk im saiñ bad ban nym don kano-kano ka jingtieng jingsyier ha ka ïaid ka ïeng, ka seng ka la dawa na u SP ba pynshitom tyngeh bad ban pynngat ha ki kyndon aiñ kiba khlaiñ ïa kine ki briew khnang ba kiwei kin ym nud shuh ban leh kum kine ki kam sniew.
