Shillong, Nailar 19
Ka Meghalaya State Planning Board (MSPB) ha ryngkat bad ka tnad PWD Roads ha ka 19 tarik u Nailar 2025 ki la leit ban jurip ïa ka surok Upper Shillong kaba dang sdang shna pynbha mynta.
Kane ka jingleit ban jurip ïa katei ka surok hapoh ka jingïalam u Bah Metbah Lyngdoh Chairman ka MSPB kadei hadien ba ki paidbah kiba ïaid lyngba kane ka surok ki la ud la nam namar ka jingpyntrei ïa ka surok Upper Shillong ka la slem bha.
Ka jingjurip ka la sdang naduh Umshyrpi ter ter, 4 mile, 5 mile bad la pynkut pat ha Fly-over kaba don ha Pomlum PHC, ha ka jingïadonlang u Bah Metbah Lyngdoh Chairman ka MSPB, Bah Olan Sing Suiñ MLA ka Mawsynram Konstitwensi, Bah Mathew Beyondstar Kurbah MLA ka Mawphlang Konstitwensi, Bah Fedrick Roy Kharkongor, Principal Secretary Arts And Culture, ki ophisar ka tnad PWD Roads, ophis ka tnad NHIDCL nalor kiwei kiwei de.
Ka jingslem ka Tnad NHIDCL ban pyntrei ïa kane ka surok ka la wanrah ka jingeh bad syllang ïa ki paidbah haduh katta katta, nalor kata ka jingdheng kali ha kitei ki thaiñ kaba la jur palat. Kumta ka la pynlong ïa ka Meghalaya State Planning Board ha ryngkat bad ka tnad PWD Roads ban leit jurip ïa katei ka surok.
Haba kren sha ki lad pathai khubor hadien ba la dep ban jurip u Bah Metbah Lyngdoh, uba long u Chairman ka Meghalaya State Planing Board (MSPB) u la ong ba ha kapor ba la aiti ïa ka kam sha ki kontraktor lyngba ka tnad PWD bad lyngba ka NHIDCL ka kam ka ïaid sted bha hynrei mynta pat ka kam ka la ïaid suki.
U la ong ba na ka liang ka tnad ka la buh 2 snem ban pyndep ïa kane ka surok Upper Shillong bad na ka liang kiba peit ïa ka jingpyntrei ïa kane ka surok pat ki ïathuh ba ha u bnai Nohprah (December) 2025 kin sa pyndep noh.
U Bah Metbah u la ong, “Ngi don ka jingartatien ban dep kloi ïa kane ka surok hynrei ki nongpeit ban shna ïa kane ka surok ki la kular ban pyndep noh ha u bnai Nohprah (December).”
U la ong, “Ngi wan ban jurip nyngkong eh ïa kane ka surok Upper Shillong kadei namar ba kiba bun ki nongshong shnong na kane ka thaiñ, la ka long na West Khasi Hills, South West Khasi Hills, Eastern West Khasi Hills, East Khasi Hills ki ïa kynduh bun bha ki jingeh.”
“Ka jingeh kaba ki ïakynduh man ka sngi ka long ba haba ki paidbah ki ïaid na kane ka surok kin hap ban ïaid beit kumba 1 ne 2 kynta eiei ban poi shaduh sha Anjalee bad kumta kane kadei kawei kaba ngin hap ban peitbha”, la bynrap u Bah Metbah.
Kumta na ka liang u Bah Metbah Lyngdoh u la khmih lynti ba ïa kane ka surok kin sa pyndep noh ha u bnai Nohprah (December).
