Shillong, Nailar 19
Ka Myntri ka tnad ka Koit ka Khiah, ka Dr. M. Ampareen Lyngdoh ka la pynpaw ïa ka jingkyrmen skhem halor ka jingïaid shakhmat jong ki kam ki jam haba ïadei bad ka Shillong Medical College (SMC), da kaba kdew ba kane ka jaka pule ka dang ap ïa ka shithi jingbit ne ka Letter of Permission (LOP) na ka Medical Council of India (MCI).
Katkum ka jingong jong ka, ka tnad ka la trei minot, bad u Myntri Rangbah ka Jylla u la ai ka jingkyrshan kaba pura.
Haba kren sha ki nongthoh khubor ha ka Sngi Ba-ar, ka Dr. Lyngdoh ka la kdew ba ka LOP ka long shabar ka jingkhmih jong ka Jylla ban kren eiei, hynrei ka ngeit skhem ba ka kolej ka long kaba la khreh ban sdang noh.
Ka Director jong ka SMC ka la shimti ïa ka kam bad ka la pyllait noh ïa ka jingshakri ba hashuwa ha RIMS Imphal.
Ka Myntri ka la pynbna ruh ba ka jingïasyllok na bynta ki ‘seat’ MBBS yn sa pynbna noh shen.
“Lada phi kylli ïa nga, hato ngi long kiba la khreh, ngan ong hooid. Ka Director ka la shimti bad la pyllait noh ïa ka haba ïadei bad ka jingdonkam na ka shlem pule kaba ka don mynshuwa shane ka RIMS Imphal bad nga ngeit skhem ba ka dei ban jia, ngi don haduh ka taïew ba khatduh jong u bnai Nailur ban pyrkhat sani bha ïa kane hynrei ïa mynta, hooid, ïa ka jingïasyllok na bynta ki ‘seat’ MBBS yn sa pynbna noh shen,” ong ka Dr. Lyngdoh.
Watla kam shym la lah ban ïathuh ïa ka jingdon ki ‘seat’ ba tikna kiba la mang sha ka Sorkar Meghalaya, hynrei ka la pynpaw ka jingkyrmen skhem ba ka jingkheiñ kan long kumjuh kumba la mang ha u snem ba la dep, kaba long kumba 96 ne 110 ‘seat’.
Ha kaba ïadei bad ka jingthung ïa ki nonghikai, ka Dr. Lyngdoh ka la pynpaw ba ka kolej ka la duna ki nonghikai, hynrei ka la don ka jingkiew kaba paw ha kane ka liang.
Ka la kdew ruh ba ki la don ki jingpynbna na bynta ki kam nonghikai, bad ka kolej ka la jan pyndep haba ïadei bad ka jingdonkam jong ki nonghikai.
Ka Myntri ka la bynrap ba ki don katto-katne ki Medical College kiba la sdang ha ryngkat ka jingduna ha ka liang ki nonghikai, bad ka don ka jingkyrmen ba ka Shillong Medical College kan sa lah ban sdang noh shen.
Shuh shuh ka la kdew ba ka don ka jingbuh por ban pyndep ïa ki jingpynkhreh kiba donkam hapoh ka taïew ba khatduh jong u Nailur.
