Shillong, Nailar 19
Ka Dorbar Shnong Mawryngkneng ha ryngkat ka jingwan synranlang u MLA ka thaiñ u Bah Heavingstone Kharpran ki la leit ban ïakynduh ïa ka Myntri ka Koit ka khiah ka Kong Ampareen Lyngdoh ban dawa thung biang ïa ki doktor ha ka PHC Mawryngkneng.
Haba ïakren bad ki lad pathai khubor u Bah Peter J Lawai Sordar Shnong Mawryngkneng u la ong ba naduh ba la kyntiew kyrdan ïa ka PHC Mawryngkneng sha ka CHC naduh u snem 2021 hynrei ka rukom treikam ka la dkhoh sha ba palat.
“Ka CHC Mawryngkneng ka dkhoh bha ban ai ka jingshakri sha ki paidbah ka dong ka thaiñ. Ngi lah ïoh ka jingujor na kiba bun ki paidbah ba ka jingtreikam katei ka CHC Mawryngkneng kam pynhun ïa ki paidbah.” La ong u Bah Peter.
Kumta u la ong ba ka jingïakynduh ïa ka Myntri ka long ban pynsngew halor kiba bun ki jingdonkam ha katei ka PHC Mawryngkneng.
U Bah Peter u la ïathuh ba kawei ka jingduna eh ha katei ka CHC kadei ka jingbym don ïa ki doktor bad ki duna palat ki doktor, bad ngi la dawa na ka Myntri ba kidei ban thung biang ïa ki doktor khnang ba kan ai ka jingshakri kaba bha ïa ki paidbah ka dong ka thaiñ.
Na ka liang ka Kong Ampareen Lyngdoh ka la ong ba kin sa shong ïa ka jingïalang bad ki ophisar ka CHC Mawryngkneng ha kine ki 3 sngi ban wan ban peitbniah ïa ki jingdonkam hapoh ka katei ka CHC.
U Bah Peter u la ong ba ngi Khmih lynti ba ka jingkular jong ka Myntri, ka jingpynbiang ïa ki jingdonkam ha ka CHC Mawryngkneng kan iaid beit iaid ryntieh.
