Shillong, Nailar 19
Ka NorthEast United FC ka la nangjan ban rah biang ïa ka nam lahduh ha ka sien kaba ar ha ka lympung ïalehkai Durand Cup, hadien ba ka la lah ban pynliem noh ïa ka Shillong Lajong FC da 1-0 kol ha ka sngi Ba-ar ha JN Stadoum, Polo.
Kane ka nam jop ka la wan urlong lyngba ka shi kol ba la thep da u rangïalehkai barim ka Shillong Lajong u Redeem Tlang na ka bynta ban pynlong ïa ka NEUFC kum ka kynhun kaba nyngkong eh ban jam sha ka final ha kane ka lympung.
Kumba ka paw kane ka long ka jingshah rem kaba lai sien lai wat ïa ka Shillong Lajong ha ka NorthEast United. Ha ka jingïalehkai jong ka Group-E mynta u snem, ka NorthEast United ka la jop da 2-1 kol ïa ka Lajong bad ha ka semi final jong u snem ba la lah ka la jop da 3-0 kol.
Haba phai sha kane ka jingïakhun kaba la long kaba itynnad bad kaba ïakhaid bha ha kaba ka la pynhun ïa kumba 15 hajar ngut ki paidbah kiba la pyndap ïa katei ka stadium. Kumba ka paw ka Lajong ka la pyrshang ban ïakhun tyngeh watla ka NEUFC ka long ka kynhun kaba khlaiñ bor khatduh ka jingdon ïa ki rangïalehkai ba kynsai.
Hadien shiteng kynta ka NorthEast United ka la ïoh ïa ka kabu kaba biang bha hadien ba u Redeem u la ïoh ïa ka bol ban shut na jngai ha kaba u rangapkol ka Lajong um shym la lah ban pyllait na ka jingshah thep ha ka minit kaba 35.
Hadien ba la bteng ïa ka jingïakhun jong ka kylla miet kine ki kynhun ki la ïai bteng ban ïakhun tyngeh shuh shuh. Watla baroh arliang ki la ïoh ïa ki kabu kiba biang, hynrei haduh kaba kut kim shym la lah ban pynurlong bad ka NorthEast United ka la khur syndon ïa ka jingjop.
Kawei pat ka jingïa-lehkai semi final kan long ha ka sngi Balang hapdeng ka Diamond Har-bour FC pyrshah ïa ka East Bengal ha ka por 7 baje janmiet ha Kolkata.
