Guwahati, Nailar:
Ka Gauhati High Court ka la bthah ban pynkynriah ïa ki longïing na ki khlaw ba la buh kyrpang hapoh hynñiew sngi. Ka ïingbishar ka la kyntait ïa ki 74 tylli ki jingdawa jong ki nongmudui namar ka jingbym biang ki kot ki sla jong ka hok kam trai jaka jong ki.
Ki kyndon pynkynriah ha ki por ban wan ki kynthup ïa ka jingthoh ba 30 sngi bad ka jingker pud jong ka khlaw
Ka Gauhati High Court ka la bthah ïa ki longïing kiba sah hapoh ki khlaw Doyang bad Nambor reserve ha Golaghat distrik jong ka Assam ban pynkynriah noh ïa ka jaka hapoh hynñiew sngi, da kaba rai ba ym don u nongwan rung tuh uba lah ban dawa hok katkum ka aiñ halor ki jaka khlaw ba la buh kyrpang.
Ka kynhun ki nongbishar kaba kynthup ïa u Chief Justice Ashutosh Kumar bad u Justice Arun Dev Choudhury ki la ban jur ba ki jingbakla kiba la leit noh ha kaba buddien ne pyntreikam kim lah ban pynshisha ïa ka jingdon be-aiñ ïa ki jaka khlaw.
Ka kashari ka la ai bor ïa ka sorkar jylla ban pynlong ïa ka jingpynkynriah lada ki longïing kim kohnguh ïa ka hukum haduh ka sngi U Blei.
Kane ka rai ka la mih hadien ba 74 ngut ki nongmudui ki la tuklar ïa ki jingpynbna pynkynriah shnong ba la pynmih da ka bor pynïaid distrik ha Golaghat, da kaba kdew ïa ka aiñ pynïaid jaka jong ka Assam jong u snem 1886, ka Assam Land Policy jong u snem 2019, bad ka jingbthah jong ka Supreme Court naduh u bnai Nohprah 2024.
Ha kaba ïadei bad kane, ka kynhun nongbishar ka la kyntait ïa ki jingïania, ha kaba la ong ba ki nongmudui kum shym lah ban pynshisha lyngba ki kot ki sla ïa ka jinglong trai jaka jong ki ha kaba la aipor ïa ki kumba shiphew sngi ha basdang une u bnai ban leh ïa kaba la hukum.
Ka iingbishar ka la buh ruh ia ki kyndon na ka bynta ki jingpynkynriah briew ha ki por ban wan, da kaba ai jingmut ba ki bor synshar ki dei ban ai por kaba biang ïa ki nongshong shnong kiba shah ktah-shiphew sngi ban pynkhreh bad sa shiphew sngi ban pynkynriah-katba ha kajuh ka por ki shim ïa ki lad jingïada kiba khlaiñ.
Kine ki kynthup ïa ka jingker ïa ki pud ki sam jong ki khlaw, ka jingbuh ïa ki jaka talasi ba neh, bad ka jingsdang ban pynshitom ïa ki heh sorkar ki bym lah ban khanglad ïa ki jingwan rung tuh.
