Shillong, Nailar 19
Ka Kong Ampareen Lyngdoh kaba dei ka Myntri ba khmih ïa ka tnat ka Koit ka Khiah kala pyntip ba ka jingtyrwa ban pynkiew ïa ka pisa jong ka bond ïa ki samla ba leit pule MBBS kala don hapdeng ka jingbishar jong ka Sorkar Jylla.
Haba kren sha ki lad pathai khubor ha ka sngi Ba-ar ka Kong Ampareen ka la ong, “La ngin kyntiew ne em ïa ka bond ka dei ka kam kaba ngi dang shong bishar mynta.”
Kane ka jingkynthoh kala mih hadien ka jingdawa ba dang shen jong ka Hynñiewtrep Youth Council (HYC) ban leh tyngeh pyrshah ïa ki samla pule MBBS ba bei tyngka ka Sorkar, ki bym shym la wanphai ban ai ka jingshakri ïa ka Sorkar hadien ba ki la pyndep ïa ka jingpule.
Ka Myntri kala pynpaw ïa ka jingkyrmen ba ka Sorkar kan lah ban shong bishar bha ïa kane ka kam bad ban shim ïa ka rai ka ban ai jingmyntoi ïa ka Jylla bad ïa ki nongshong shnong.
Ka HYC kala ai jingmut ban pynkiew ruh ïa ka bond sha ka T.1 klur ka ban sdang treikam naduh ka samoi pule u snem 2026-27.
Ka HYC kala sot na ka jingshem RTI kaba pynpaw ba hapdeng u snem 2015-16 bad 2019-2020, ka Sorkar Jylla kala bei pisa ïa 359 ngut ki samla pule ba kin leit pule MBBS hynrei haduh 96 ngut ki samla pule kim shym la wan phai ban ai ka jingshakri ïa ka Sorkar bad ban pyndep ïa ki kyndon bala ïateh hapoh ka bond.
Ka Kong Ampareen kala ban jur ba ka jingïatai halor ka bond bad ka jingpynbor ïa ki doktor ban soi ïa ka bond katkum ka aiñ kam dei satia kaba dang thymmai bad kala ïaid la bun-bun snem.
Ka Myntri kala pynpaw ba ka Sorkar kala mad ïa ki jingeh haba ïadei bad ki doktor ki bym wan phai pat sha ka Jylla hadien ba ki pyndep ïa ka jingpule jong ki.
Hynrei, da ka jingpynkha ïa ka Meghalaya Medical Registration Council, ka jinglong jingman kala kham bha, bad ki samla pule ki donkam mynta ban register bad ka State Board hadien ba ki pyndep ïa ka jingpule MBBS.
“Kumta ki kam kila kham biang. Ngi sngewnguh ïa u Myntri Rangbah bad ka Kynhun Myntri namar ka jingmynjur bad ai jingbit ban thaw ïa kane ka Board,” kala ong.
Ka Myntri kala pynpaw ruh ba ka pisa jong ka bond ka dei kaba la pynkiew ha ki snem bala leit. “Hooid, ha kawei ka por ki samla pule ki hap ban ai T.34-35 (lak) bad la pynkiew sha ka T.40-45 lak bad u nombor u la nang kiew hynrei ngi la ïohi ba ki samla pule kim ipatiaw satia da kaba ïasoi ïa ka bond. Kam dei satia ka kam ban sngew kit ram da ka pisa ka ban btin lynti ïa ki samla pule ka Meghalaya,” kala ong.
Hynrei kala ban jur ba ka jingpynleit jingmut ka dei ban long ka jingpynshlur ïa ki samla pule ba kin wanphai sha la ïing bad shakri ïa la ki jong ki briew ha ka jaka ba kin sngew kit ram na ka pisa.
Ka Myntri kala pynpaw ïa ka jingkyrmen ba ka Sorkar kan lah ban shong bishar bha ïa kane ka kam bad ban shim rai ka ban ai jingmyntoi ïa ka Jylla bad ïa ki nongshong shnong.
