Shillong, Nailar 19
U Myntri ka Sorkar Jylla bad nongïalam ka BJP, u Bah A.L. Hek u la pynpaw ba ka Sorkar Jylla ka la shim ïa ki lad ki lynti ban weng ïa ka jingeh haba ïadei bad ka jingbym siew tulop ïa ki nongtrei jong ka Garo Hills Autonomous District Council (GHADC) ha kine ki 43 bnai ba la dep.
Haba jubab ïa ka jingkylli, u Bah Hek haba kren sha ki nongthoh khubor ha ka Sngi Ba-ar u la ong, “Ngam ong ba ka Sorkar Jylla kam leh eiei ban pynbeit ïa katei ka jingeh. Ngi don ïa u Myntri Rangbah bad u Symbud Myntri Rangbah ba peit ïa ki kam jong ka District Council bad ma ki ruh ki leh la ka kamram ban (pynbeit ïa kane ka jingeh).”
Ha kawei ka liang, u Bah Hek u la ban jur ba ka jingsiew tulop ka dei ka jingkitkhlieh jong kano-kano ka jaka treikam ne ka Sorkar ne ka District Council.
Haba kylli, u Myntri u la ong, “Ngam tip kumno ki (ADC) ki siew ïa ka tulop lyngba ka khajna jong ki hi ne la siew da ka Sorkar.”
Katkum ka jingong jong u, ka long kaba donkam ban wad ïa ki jingshisha halor kaei kaba jia. Ha kaba ïadei bad ka rai jong u MDC ka BJP na Tura, u Bernard N. Marak ban kyrpad ïa ka jingtuklar jong u Myntri Rangbah ka Assam ban shah ïa ka seng ban shimti ïa ka synshar-khadar ha GHADC, u Bah Hek u la ong ba ban rah ïa ki jingeh jong ki sha ki bor ba halor kam dei kaba bakla.
“Ki (nongïalam ka seng) la wanrah ïa kane ka mat sha ka jingtip jong u Lat, ki la wanrah ïa ka sha ka jingtip jong u Myntri Rangbahduh bad kiwei-kiwei ki Myntri Rangbah. Kumta ban wanrah ïa kane sha ka jingtip jong ki bor ba halor, kam dei ka kam kaba bakla. Ki lah ban leit sha kino-kino ki bor ba halor…kata kam dei ka jingeh,” u la pynpaw.
