Khliehriat, Nailar 19
Ka kynhun Anti-Narcotics Task Force (ANTF) ryngkat ki pulit ka East Jaiñtia Hills District ha ka step 19 tarik Nailar ki la ïoh ban kem noh ïa arngut ki suba snar nongpynïaid ïew ïa ki jingdih pynbuaid bad la ïoh kurup na ki bun bah u kynja nalor ki hajar tylli ki dawai kuli pynbuaid.
U Superintendent of Police ka EJH, u Vikash Kumar, IPS u la ong ba ha ka 18 tarik Nailar hadien bala ïoh ïa ka jingtip kaba thikna halor ka jingdon jong ki suba nongkhaïi drok kiba mih na Silchar, Assam ban wan sha Shillong da kawei ka bos MTC ha ryngkat ki suba jingdih pynbuaid.
Kumta ha ka step phyrngap la pynlong ka jingpynap shrip ha ki bynta jong ka thanad Lumshnong ha kaba ki la ïoh ban bat noh ïa ka bos MTC kaba don ïa u No ML03-0222 bad kem noh ïa ki arngut ki suba donkti ïa kiba la tip kyrteng kum u Amol Nath, 42 snem rta uba dei na Silchar, Kachar, Assam bad u Radika Ranjan Das uba dei na Komalpur District ka Tripura.
Hadien ba la pynlong ïa ka jingtalasi hapoh ka kyndon 50 jong ka NDPS Act, ha ka jingïadon lang ki sakhi ba laitluid ki pulit ki la ïoh ban kurup noh haduh 10.35 kilo u kynja, 2,736 tylli ki Tramadol Hydrocholoride capsule, 6000 ki Nitrazapem tablet bad 2 tylli ki mobile phone.
U SP u la ong ba kine nongkhaïi la suba jur ba ki dei ki ‘gang’ kiba don la ka kynhun ban pynïaid ïew ïa ki kine ki jingdih pynbuaid.
Ki pulit ki la register case pyrshah ïa kine ki arngut hapoh thanad Lumshnong bad ka jingtohkit ka dang ïaid shakhmat ban lapdien ïa kiwei pat kiba donkti.
Na ka liang u SP u kyntu ruh ïa kino kino kiba don jingtip ha kaba ïadei bad kiwei pat ki runar kiba donkti ha kane ka kam bymman ba kin ai jingtip mardor sha ki thanad ha kaba yn buhrieh ïa ki kyrteng jong ki bad ban ai ruh da ka khusnam.
