Shillong, Nailar 19
Ki rephri ka Shillong Sports Association (SSA) ki la hap ban pynsangeh shi syndon ïa ka jingïakhun jong ka lympung ïalehkai ka Second Division Football League 2025 ha ka sngi Ba-ar ha SSA Stadium kaba ha First Ground Polo, tang namar ba hadien ka jingther kynsan u slap, ha kaba kawei na ki bynta jong ka madan kaba don marjan bad ka jaka ba ju shong u Fourth Referee bad ki rangïalehkai, ka la lang um bad at syndon kum ka balloon.
Kane ka jingïakhun kaba dei bam long ha kane ka sngi ka dei ban long hapdeng ka Mylliem Lum SC pyrshah ïa ka Lumshyiap SC ha ka por 12:15 mynsngi.
Haba ïadei bad kane ka jingjia, na ka liang u rephri ba dei ban pynïaid ïa kane ka jingïakhun u Bah Pynskhemhame Mawthoh, ha kaba u la ïathuh ba ka madan kam long ban pynïalehkai namar ka jingdap jong ka um bad ym tang ba shu dap tang ka um, hynrei ka madan ka la sdang ruh ba kan at la kum ka balloon, bad khnang ban ïada pat ïa ki rangïalehkai, la hap ban pynsangeh noh syndon ïa kane ka jingïakhun.
Haba ïakren bad u President ka SSA u Bah Banteidor Lyngdoh ba dei ruh u MLA ka Mawkynrew Constituency, u pynpaw ba na ka liang ka jong u, u la pyntip ïa kane ka jingjia bad ïathuh ruh ba ka daw ka jingdap kynsan jong ka umslap, ka dei namar ba la set ïa ka nala um kaba dei ban tuid ka um na madan.
Hynrei ïa ka jingïalehkai quarter final jong ka SSA SRGT Third Division Football League kaba la long ha ka por 2:45 nohphai sngi hapdeng ka Mawkriah West SC bad ka Ïaityllilang SC la lah ban pynïaid beit kumba ka dei ban long.
