Gaza, Nailar:
Katkum ki khubor, la ong ba ka Hamas ha ka Sngi Nyngkong, ka la mynjur naka bynta kino- kino ki jingtyrwa sangeh thma jong ka Israel, namar la ong ba ka thma jong ka Israel bad ka Hamas ka la neh mynta la kumba 22 bnai mynta.
Kumta, la ong ba katei ka kynhun lehnoh jong ka Palestine, ha kane ka kynti, ka la pynpaw ha ki nongthoh khubor na Gaza, ba ka long ba la kloi ban mynjur ia kino- kino ki jingtyrwa sangeh thma jong ka Israel, khlem da pynpaw shuh ia kino- kino ki jingdawa na ka liang jongka, kumba ka ju leh barabor. Kumjuh ruh uwei u heh ka Palestine ha ka Sngi Nyngkong, u la ong ba ki nongpyniasuk ia ka Israel bad Hamas, ki la tyrwa ia ka Hamas ban sangeh thma 60 sngi bad ban pyllait noh ruh ia ki briew jong ka Israel, kiba ka la rahbor naduh ba sdang jong ka thma ha u Risaw jong u snem 2023, ha ki 2 tylli ki sien pyllait briew kiba ka Hamas ka lah ban jied bad ban ia pynbeit hi bad ka Israel.
Namar la ong ba naduh ki por ba la leit, ka Israel ka ju mynjur ia ki jingiakren iasuk bad ka Hamas, hynrei ka Israel ka la dawa ba ka Hamas ka dei ban pyllait noh shwa ia baroh ki nongshah rahbor jong ka Israel, hynrei ka Hamas ka ju wanrah la ki jong ki mat jingdawa bad ka ju dawa ruh ba dei ban phah mih noh shwa ia ki shipai jong ka Israel na ka nongbah Gaza bad lada ka Israel ka mynjur ia kane, ka Hamas kan sa pyrkhat ban mynjur ia ki jingiateh kular ban sangeh thma noh shi syndon.
