Shillong, Nailar 19
Ka kynhun ki ‘thei ïalehkai U-17 jong ka India kan sdang ïa ka jingïalehkai kaba nyngkong ha ka SAFF U17 Women’s Championship 2025 pyrshah ïa ka Nepal ha ka sngi Balang ha Changlimithang Stadium kaba ha Thimphu, Bhutan, ha ka por 2:30 nohphai sngi.
Ha kane ka lympung ki don saw tylli ki kynhun, ha kaba ka ka Bangladesh bad ka Bhutan ki long kiwei pat ki ar tylli ki ban ïakhun pyrshah iwei ïa iwei pat ha ka jingïalehkai kaba arsien, kaba mut ba kawei pa kawei ka kynhun kan ïalehkai mar hynriew sien. Ka kynhun ka ban wan ha ka kyrdan ba hakhlieh hadien ka jingïalehkai kaba khatduh ha ka 31 tarik kan ïoh ban rah ïa ka nam lahduh.
Kaba kham sngewtynnad hangne ba ki don ar ngut ki ‘thei ïalehkai ka Jylla kiba la don hapoh kane ka kynhun kata ka Bonifilia Shullai bad ka Alisha Lyngdoh hadien ba u coach kane ka kynhun u Joakim Alexandersson u la pynbna ïa ka thup ki nongïalehkai na ka bynta kane ka lympung ka ban long ha Bhutan.
