Shillong, Nailar 19
Ka Meghalaya State Commission for Protec-tion of Child Rights (MSCPCR) ka la pynpaw ïa ka jingsngewkhia kaba jur halor ka jingshah thombor ba dang shen jong kawei ka khynnah skul kaba dang 16 snem ka rta ha Jaïaw, Shillong bad ka la ong ba ki pulit ki dang ïaid shakhmat ha ka ban wad bad kem ïa kito kiba donkti ha kane ka kam runar.
Ha kane ka jingjia, arngut ki nonglute kiba la kah dur khmat ki la dung da u injek ïa katei ka khynnah hashuwa ban phet krad na katei ka jaka.
Ka Chairperson ka MSCPCR, ka Agatha Sangma ka la ong ba kane ka jingjia ka long kaba “kyndit” bad ban jur halor ka jingdonkam ban ïatreilang ban pyntikna ïa ka jingshngaiñ jong ki khynnah.
“Ngi kwah ban don ïa ka Jylla ha kaba ki khynnah kin shngaiñ, bad ban lah ban leit skul ha ryngkat ka jingshngaiñ ka dei ka hok jong uwei-pa-uwei u khynnah,” la ong ka Agatha.
Ka Chairperson ha ka Sngi Ba-ar ka la leit jngoh ïa katei ka khynnah bad ka la ïakren bad ka, da kaba ai jingïaroh ruh ïa ka jinglong kloi jong ka ban wad jingsumar mar-mar hadien katei ka jingjia.
Ka Agatha ka la pynskhem ïa ka jingdonkam jong ki CCTV kiba treikam bad ka jingpeitngor kaba kham bha ha ka Jylla.
“Ngi hap ban thaw ïa ki lad jingpeitngor kiba kham bha ha ka Jylla jong ngi, kumjuh, ngi dei ban don ïa ka rukom pahara kaba kham bha,” ka la ong.
Watla, la buh ïa ki kor CCTV ha katei ka jaka, ka Agatha ha kawei ka liang ka la pyntip ba ïa ki dur-khih ïa mynta ym pat lah ban ïoh, bad katei ka khynnah kam lah ban pynithuh ïa ki nongthombor namar ka jingkah dur khmat ha ryngkat bad ki ‘helmet’.
“Ki pulit ki dang tohkit bad peit bniah ïa kane ka kam,” la ong ka Agatha haba pynpaw ïa ka jingkyrmen skhem ba shen yn sa kem ïa kiba donkti ha kane ka kam runar.
Shuh shuh ka Chairperson ka la kyrpad ïa ki khynnah ba kim dei ban duh mynsiem na kane ka jingjia bad ba kin ïai bteng ban leit skul khlem ka jingsheptieng. Ka la ban jur ba watla kane ka jingjia ka long kaba sngewkhia, hynrei ki khynnah ha Meghalaya barabor ki sngewshngaiñ haba ki leit skul.
Na ka liang ka Agatha ka la ban jur halor ka jingdonkam ban don ïa ka jingïatreilang hapdeng ka Sorkar bad ka imlang-sahlang kumjuh ban pynsngewthuh bad ban pynlong ïa ka imlang-sahlang ban kham phikir haba phai sha ka jingshngaiñ jong ki khynnah.
