Shillong, Nailar 19
Ka Dorbar Shnong Mawkynroh-Umshing ka la jam sha uwei u mawmer da ka jingplie paidbah ïa ka Community Hall ba thymmai da u Myntri Rangbah ka Jylla u Conrad K Sangma.
Ha kane ka jingïalang la ïashim bynta da ki nongïalam shnong, ki nongshong shnong, bad ki samla pule na ka St. Luke’s and Grace Academy.
Ha ka jingkren jong u, u Myntri Rangbah ka Jylla u la pynpaw ïa ka jingsngewnguh ïa ka jingpdiang sngewbha bad ïaroh ïa ka imlang sahlang halor ka jingshimkhia jong ki ban pynurlong ïa kane ka projek.
U la pynpaw ïa ka bynta jong ka Chief Minister’s Special Development Fund (CMSDF) ha kaba kyrshan ïa ki jaka treikam bad ki shnong ha kylleng ka jylla, da kaba kdew ba kane ka pisa mynta ka la poi shaduh Mawkynroh-Umshing, kaba wanrah ïa ka jingkylla kaba don jingmut ha ka thaiñ. U la ban jur ba watla ka pisa ka lah ban long kaba rit, hynrei ka jingktah jong ka ha ki jaka pule, ka jingpynroi ïa ka thaiñ bad ki jingthmu jong ka imlang sahlang ka long kaba kongsan.
U Myntri Rangbah u la kular ruh ban kyrshan beit ïa ki samla jong ka imlang sahlang, kynthup ïa ka jingpynbiang ïa ki tiar ïalehkai, ki tiar tem, bad ki prokram ai jinghikai na ka bynta ki nongseng kam seng jam bad ki nongrep.
U Myntri Rangbah ula pynshlur ruh ïa ka shnong ba kan pynlong ïa ka hall kum ka jaka pdeng jong ki kam ban tei bad ba don jingmut, haba pynthikna ba ki samla ki ïoh ïa ki kabu ba kin kiew, ki long kiba donsap bad ban tei ïa ka sap ba ki don.
U la pynpaw shuh shuh ïa ka jingangnud jong ka Sorkar ban ïatreilang bad ki jaka pule tynrai bad ki nongshong shnong ban pynïaid ïa ka roi ka par kaba neh ha ka thaiñ.
U Myntri Rangbah u la pynkut da kaba pynpaw ïa ka jingkmen ban long shi bynta jong kane ka projek kaba pynkylla dur, da kaba ïaroh ïa ka jingaiti lut jong ka imlang sahlang, bad kitbok kitrwiang ïa ka jingkiew shaphrang na ka bynta ka Mawkynroh-Umshing.
Ban pyndap ïa ka mynsiem jong ka jinglehkmen, ki khynnah na ka St. Luke’s and Grace Academy ki la rwai ïa ka jingrwai “Ri Lum,” kaba la ïoh ïa ka jingïaroh kaba sngewtynnad bad kaba la pynpaw ïa ka kolshor kaba riewspah jong ka imlang sahlang.
